Senbide Grýzııada jergilikti bılik organdarynyń, sonyń ishinde Tbılısı meriniń saılaýy ótti. Eldiń burynǵy prezıdenti M.Saakashvılıdiń Grýzııaǵa oralyp, ustalýy da saıası ahýaldy kúrdelendirip jiberdi.
2 qazanda saılaýshylar jergilikti ózin ózi basqarý organdarynyń (sakrebýlo) 2 myńnan astam múshesin jáne Tbılısı, Kýtaısı, Potı, Batýmıdi qosa alǵanda, 64 qalanyń ákimderin tańdady. 3,4 mıllıon azamattyń daýys berý quqyǵy bar, 241 adam ákim bolýǵa, al 2,8 myń úmitker qalalyq keńesterge óz kandıdatýrasyn usynǵan.
Bıylǵy jaǵdaı 2012 jyldan bastalǵan saılaý naýqandarymen uqsas. Negizgi doda bıleýshi «Grýzın armany» men «Birtutas ulttyq qozǵalys» oppozısııasynyń arasynda órbidi. Saılaýǵa barlyǵy 40-tan astam partııanyń ókilderi qatysty.
Bul saılaý Grýzııada qalyptasqan ishki saıası daǵdarystyń taǵy bir kezeńi boldy. Jaǵdaı 2020 jyldyń kúzinde ótken parlamenttik saılaýdan keıin taǵy ýshyǵa túsken. Saılaýda «Grýzın armany» partııasy basymdyqpen jeńip, ózge toǵyz oppozısııalyq partııa parlamentke ótken. Alaıda olardyń barlyǵy derlik saılaý kezindegi zań buzýshylyqtardy aıta kele, jańa Parlamentte jumys isteýden bas tartqan. Saıası tyǵyryqtan shyǵatyn joldy tabý úshin Eýropalyq Keńestiń basshysy Sharl Mıshel aralasýǵa májbúr bolǵan.
Daýys berý aıaqtalǵannan keıin shyǵarylǵan exit poll nátıjesi boıynsha bıleýshi partııa alda kele jatqany belgili boldy.
Grýzııa oppozısııasy jergilikti saılaýdyń nátıjelerin bılikke degen senimniń «referendýmy» retinde qarastyryp otyr. 2021 jyldyń sáýirinde Eýropalyq Keńestiń prezıdenti Sharl Mısheldiń deldaldyǵymen «Grýzın armany» partııasy men birneshe oppozısııalyq partııa arasynda Grýzııanyń saıası daǵdarystan shyǵýy týraly kelisimge qol qoıylǵan. Qujatta birqatar reforma qarastyrylǵan, sonymen qatar eger bıleýshi partııa jergilikti saılaýda 43%-dan astam daýys jınaı almasa, merziminen buryn parlamenttik saılaý ótkizetini týraly da ereje bar. Alaıda keıinirek bıleýshi «Grýzın armany» partııasy bul kelisimnen shyqty. Onyń ókilderi eger bıleýshi partııa jergilikti saılaýda 1% daýys jınasa da, merziminen buryn parlamenttik saılaý bolmaıtynyn málimdegen.
Sondaı-aq 1 qazanda Grýzııa premer-mınıstri Iraklıı Garıbashvılı ótkizgen tótenshe brıfıngte saılaýǵa oraı elge oralǵan eks-prezıdent Mıhaıl Saakashvılıdiń qamaýǵa alynǵany belgili boldy.