QR Aqparat jáne qoǵamdyq damý mınıstrliginde Qoǵamdyq keńesterdi damytý úshin arnaıy saıt quryldy. Bul týraly TALAP qoldanbaly zertteýler ortalyǵynyń dırektory Rahym Oshaqbaev OKQ-da ótken baspasóz konferensııasynda aıtty, dep habarlaıdy Egemen.kz.
Ortalyq dırektorynyń aıtýynsha, qazirgi ýaqytta qoǵamdyq keńesterdiń edáýir bóliginiń «belgili bir dárejede onsha joǵary emes belsendiligi» baıqalady.
«Bul, múmkin, bir jaǵynan, qoǵamdyq keńester músheleriniń belsendiliginen týyndaǵan másele. Ekinshi jaǵynan, olardyń qyzmeti týraly aqparattyń bolmaýy. Osynyń aıasynda biz AQDM-nyń biryńǵaı portal qurý jónindegi bastamasyn quptaımyz. kazkenes.kz barlyq qoǵamdyq keńesterdiń qyzmeti týraly aqparat berýge arnalǵan biryńǵaı alań retinde, olardy qurý bizdiń zańnamada kózdelgen», dedi Oshaqbaev.
Onyń aıtýynsha, jaqyn arada bul portal óz jumysyn bastaıdy.
«Bul qalyń jurtshylyqtyń, birinshi kezekte - jýrnalısterdiń otyrystardyń hattamalaryna jáne ártúrli deńgeılerde qaralatyn máselelerge qol jetkizýine múmkindik beredi. Qoǵam da, BAQ ta ony paıdalana bastaýy úshin jáne osy portal mańyzdy jáne senimdi aqparat kózine aınalýy úshin biraz ýaqyt qajet bolady», dep naqtylady spıker.
Ol bul portaldy toltyrý Qoǵamdyq keńester hatshylarynyń, Qoǵamdyq keńester músheleriniń belsendiligine baılanysty bolatynyn aıtty. Bul ınstıtýttyń damýynyń kelesi kezeńi retinde, onyń pikirinshe, eń belsendi ǵana emes, búkil respýblıkany qamtıtyn kem degende jyl saıyn nemese toqsan saıyn úlken jınalystar, trenıngter ótkizý mańyzdy.