Almatyda jeke sot oryndaýshysy Ádil Ermekov soqqyǵa jyǵyldy. Bul iske bokstan álem chempıony Janqosh Turarovtyń da qatysy bar, dep habarlaıdy Egemen.kz.
Áleýmettik jelilerde sot oryndaýshysy laýazymdyq mindetterin oryndaý kezinde soqqyǵa jyǵylǵany beınelengen vıdeo tarady.
Jeke sot oryndaýshylar palatasynyń málimetinshe, sot oryndaýshysy A.A.Ermekovke shabýyl Almatynyń Bostandyq aýdanyndaǵy nysandy buzý kezinde jasalǵan.
3 qyrkúıekte úı ıesine atqarýshylyq is júrgizý qozǵalǵany týraly habarlama jiberilip, 4 qazan kúni sot oryndaýshysy Ádil Ermekov eki polısııa qyzmetkerimen birge óz jumysyn oryndaý úshin oqıǵa ornyna kelgen. Alaıda aınaladaǵy adamdar oǵan qysym jasaı bastaǵan. Aldymen sot oryndaýshysyn tunshyqtyrýǵa tyrysyp, keıin qabyrǵasy men ókpe tusynan urǵan.
«Sot oryndaýshysy uryp-soǵý faktisi boıynsha qylmystyq is qozǵaý týraly aryz jazdy, alaıda polısııa qyzmetkerleri qylmyskerdi ustaýǵa tolyqtaı áreket etpeı, aryzdy qabyldaýdan bas tartty», delingen jeke sot oryndaýshylarynyń Respýblıkalyq palatasynyń málimdemesinde.
Jeke sot oryndaýshysyn urǵan er adam munymen toqtamaı bokstan álem chempıony Janqosh Turarovty «kómekke» shaqyrǵan. Oqıǵa ornyna kelgen boksshy sot oryndaýshysynan polısııaǵa túsirgen aryzyn alýdy talap etken. Talaptardy oryndamaǵan jaǵdaıda kúsh qoldanatynyn da aıtqan.
Nátıjesinde sot oryndaýshysy óz jumysyn oryndaı almady.
Almaty qalasynyń jeke sot oryndaýshylar palatasynyń málimetinshe, Ádil Ermekov dárigerlerge júgingen. Qazirgi ýaqytta ol jumysta emes.
Almaty polısııasy úı ıesin polısııa basqarmasyna jetkizgenin habarlady.
«Sot oryndaýshysy úı ıesine aryz jazdy, sonyń negizinde tıisti saraptamalar taǵaıyndaldy, olardyń nátıjeleri boıynsha prosessýaldyq sheshim qabyldanady», delingen habarlamada.