Elordada qurylys alańynan armatýra urlaǵan kúdikti jasóspirimder ustaldy, dep habarlaıdy Egemen.kz.
«16 jastaǵy 2 jasóspirim qurylys nysanynan 1 mln teńgeniń materıalyn urlap ketken. Kámeletke tolmaǵan balalar 5 kún boıy kúzeti joq nysannan árqaısysynyń uzyndyǵy 6 metr bolatyn 39 dana armatýrany alyp shyqqan. Urlanǵan materıaldardy taıaý mańda ornalasqan metall qabyldaý ornyna satyp jibergen. Jedel izdestirý is-sharalary barysynda kámeletke tolmaǵandar qolǵa tústi. Polısııa qyzmetkerleri urlanǵan armatýralardy tárkilep, ıesine qaıtardy», delingen Nur-Sultan qalalyq polısııa departamenti taratqan aqparatta.
Vedomstvo málimetinshe, ustalǵan balalar kinálaryn moıyndap otyr. Olardyń elorda aýmaǵynda jasalǵan osyndaı qylmystarǵa qatysy tekserilip jatyr. Qazirgi ýaqytta sotqa deıingi tergeý júrgizilýde. Jasóspirimderdiń qurylys alańdarynda oryn alǵan taǵy 3 urlyqqa qatysy bolýy múmkin.
«Iývenaldy polısııa qyzmetkerleri 16 jastaǵy eki jasóspirimdi erekshe baqylaýǵa aldy. Al olardyń ata-analary balalaryna tálim-tárbıe berý mindetterin oryndamaǵany úshin ákimshilik jaýapkershilikke tartylýy yqtımal», dedi polısııadan.