AQSh-tyń burynǵy prezıdenti Donald Tramp 25 jyl ishinde alǵash ret Forbes boıynsha eń baı 400 amerıkalyqtyń tizimine enbeı qaldy, dep habarlaıdy Egemen.kz.
Jýrnaldyń málimetinshe, reıtıngte oryn alý úshin Tramptyń 400 mıllıon dollary jetkiliksiz bolǵan. Koronavırýs pandemııasy kezinde onyń baılyǵy 600 mıllıon dollarǵa azaıyp, 2,5 mıllıard dollarǵa jetti. Byltyrǵy reıtıngte ol 339-shy orynda bolǵan.
Habarlanǵandaı, 1997 jyldan 2016 jylǵa deıin Tramp tizimniń birinshi jartysynda boldy, alaıda AQSh-tyń iri qalalaryndaǵy jyljymaıtyn múlik baǵasynyń tómendeýine baılanysty jyl ótken saıyn tómendeı bastady.Forbes 400-degi alǵashqy ondyqty qazir Djeff Bezos, Ilon Mask, Mark Sýkerberg, Bıll Geıts, Larrı Peıdj, Sergeı Brın, Larrı Ellıson, Ýorren Baffet, Stıv Balmer men Maıkl Blýmberg ıelendi.
Eske salaıyq, AQSh-ta Trampqa qatysty birneshe tergeý júrip jatyr, olardyń keıbireýleri ekonomıkalyq qylmystarǵa qatysty. Tramp uıymy men onyń qarjy dırektory salyqtyq alaıaqtyq shemasyn qurdy dep aıyptalyp jatyr, al eks-prezıdenttiń ózi iri salyq tólemedi degen kúdikke ilindi. Tramp «mıllıondaǵan dollar salyq tóledim» dep málimdedi jáne prezıdenttiń jalaqysynan bas tartqan jalǵyz adam ekenin eske saldy.