Ulttyq statıstıka bıýrosynyń aqparaty boıynsha, sońǵy jyldary qylmystyq quqyq buzýshylyq jasaǵan balalar men jasóspirimder sany birshama azaıdy, dep habarlaıdy Egemen.kz.
«QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń derekteri boıynsha, 2020 jyly kámeletke tolmaǵandar jasaǵan 1 873 quqyq buzýshylyq tirkelgen, bul 2016 jylǵa qaraǵanda 44%-ǵa az (3 343 birlik). Kámeletke tolmaǵandar quqyq buzýshylyqtardyń úshten birin alkogoldiń áserinen jasaıdy», delingen habarlamada.
Sonymen qatar, Ulttyq bıýro quqyq buzýshylyqtar sanynyń jalpy qysqarýyna qaramastan, jasalǵan áreketterdiń aýyrlyǵy azaımaǵanyn alǵa tartty. Aýyr jáne asa aýyr quqyq buzýshylyqtar sany 2016 jyly 653 jaǵdaımen (19,5%) salystyrǵanda 2020 jyly 750 jaǵdaıdy (jalpy sanynyń 40%) qurady.
Eń úlken úlesti (53,6%) menshikke qarsy quqyq buzýshylyqtar (urlyq jáne tonaý), alaıaqtyq – 8,2% jáne avtokólik urlaý – 4,3% quraıdy. Quqyq buzýshylyqtar quramynda urlyq pen tonaýdyń úlken úlesine qaramastan, 2016 jylmen salystyrǵanda olardyń sany tıisinshe 52,4%-ǵa jáne 68,2%-ǵa tómendedi.
Sonymen qatar, sońǵy 5 jylda kámeletke tolmaǵandar arasynda sottalǵandardyń sany azdap ósti. 2020 jyly olardyń sany 396 adamdy qurady (2016 jyly 378), onyń ishinde bas bostandyǵynan aıyrýǵa 63 adam (15,9%), 52 kámeletke tolmaǵan adam shartty túrde, 6 adam qoǵamdyq jumystarǵa, 275 (69,4%) basqa jazalaý sharalaryna sottalǵan.