Buǵan deıin munaıly óńirdegi Caspiy Lana Atyrau seriktestiginiń toqyma fabrıkasy toqyraýǵa ushyraǵaly turǵanyn jazǵan edik («Toqyma fabrıkasy toqyraǵaly tur», «Egemen Qazaqstan», 29 jeltoqsan, 2020 jyl). Alty jyl buryn jobany iske qosý úshin «Atyraý» ÁKK» AQ men «Dostan ata» sharýa qojalyǵy 2,4 mlrd teńge salǵan. Alaıda byltyrdan beri toqyma fabrıkasy ábden tıtyqtady. Basty sebep – quryltaıshyǵa berejaqtyń kóbeıýi.
Qazir fabrıkanyń bir quryltaıshysy bar. Bul – «Atyraý» ÁKK» AQ. Toqyma fabrıkasynyń atalǵan quryltaıshyǵa qaryzy 1,6 mlrd teńgeni qurapty. Sol sebepten, fabrıkanyń esepshoty buǵattalyp, jumys toqtady. Zyryldap jumys istep turǵan qondyrǵylardy shań basty. Al barlyq qyzmetkeri aqysyz demalysta júr.
– Toqyma fabrıkasynyń óndirisin qalpyna keltirý máselesi birinshi jyl kóterilip otyrǵan joq. Qazir ósimpul men aıyppul sanksııalaryn esepteýdi toqtatýǵa qol jetkizdik. Biraq negizgi qaryz ótelýi kerek. О́ıtkeni bul – qaıtarylýy tıis qarjy, – deıdi «Atyraý» ÁKK» AQ-nyń departament dırektory Nurlan Qappazov.
Onyń aıtýynsha, byltyr bul fabrıkaǵa ıtalııalyq ınvestorlar qyzyǵýshylyq tanytqan eken. Alaıda koronavırýs ınfeksııasynyń saldarynan ınvestordan habar-oshar bolmaǵan. Endi toqyma fabrıkasyn jandandyrýǵa Export Center Silk Way JShS ynta bildirdi. Aldaǵy ýaqytta seriktestermen birge Caspiy Lana Atyrau JShS-niń qyzmetin qaıta qurylymdaý úshin birqatar is-sharany qolǵa alý jospary bar.
Toqyraǵan toqyma fabrıkasyn qaıta «tiriltýdi» kózdegen Export Center Silk Way JShS-niń dırektory Quralaı Qanahınanyń aıtýynsha, bul – qazaqstandyq eksporttaýshylardy qoldaıtyn, Qytaıda zańdy tulǵalar men jeke kásipkerlerdiń múddesin bildirýge baǵyttalǵan biregeı mamandandyrylǵan kompanııa. Al eksporttyq ortalyq seriktesteriniń qatarynda Caspiy Lana Atyrau JShS bar. Qytaıdaǵy B2C ınternet-dúkeniniń ekinshi bazasynda qazaqstandyq taýarlardyń mýltıbrendti onlaın-dúkeni arqyly ónim ótkizý týraly kelisimshartqa qol qoıylǵan. JD.com. onlaın-alańnyń negizgi talaby – eksporttalatyn ónimdi belgilengen merzimde ári tolyq kólemde úzdiksiz jetkizý.
– Qazir Qazaqstan men Qytaıdaǵy seriktesterdiń kómegimen kásiporyndy saýyqtyrý úshin qarjy salý, jobalyq qýatyn qalpyna keltirý, strategııalyq turǵydan damytý jóninde naqty is-sharalar ázirlendi. Bizdiń esepteýimizge sáıkes birinshi aıda jóndeý jumystaryna, shıkizat satyp alý men óndiristi iske qosýǵa shamamen 42 mln teńge qajet. Kásiporynnyń jabdyqtary qalypty jaǵdaıda, qyzmetkerleri jumys isteýge daıyn, shıkizatty satyp alatyn oryndar bar. Fabrıkanyń ónimderine Qytaıdan, Ámirlikten, Túrkııadan aldyn ala tapsyrys tústi. О́ıtkeni «Atameken» UKP kómegimen Caspiy Lana Atyrau JShS Qytaı ımporttaýshylarynyń tizilimine kirdi. Endigi basty másele – Caspiy Lana Atyrau JShS-niń eseshotyn ashý, – deıdi Quralaı Qanahına.
Osyǵan baılanysty «Atyraý» ÁKK» AQ-nyń ókili kásiporyndy qaıta qurylymdap, qarjylyq saýyqtyrý jumysyn júrgizý úshin arnaıy jospar usynýy tıis eken. Budan soń jospar jumys tobynyń qaraýyna jiberiledi. Sol sebepten, «Atameken» UKP-nyń óńirlik fılıaly bul iske bilek sybana kirisýdi kózdep otyr. Maqsat – toqyraǵan toqyma fabrıkasyn qaıta «tiriltý».
Atyraý oblysy