Osydan bir jyl buryn «SCAT» áýe kompanııasyna qarasty ushaq apatqa ushyraǵanda qaza tapqan 21 adamnyń biri – Qyzyljar óńiriniń týmasy Qaısar Málgajdarov edi. Ol keden salasyndaǵy eńbek jolyn ınspektorlyqtan bastap, polkovnık shenin aldy. Departament basshysy dárejesine deıin kóterildi. О́miriniń sońǵy jyldarynda Almaty qalasy boıynsha Kedendik baqylaý departamenti «Almaty» keden beketine jetekshilik etti. Kóp jylǵy eseli eńbegi «Qurmet» ordenimen ataldy. Salamatty ómir saltyn nyq ustap, kúresten sport sheberi atandy. «Kózden ketse de kóńilden ketpeıdi» demekshi, abzal azamatty jerlesteri umytpaq emes.
Sonyń bir aıǵaǵyndaı, «Esil» meıramhanasynda 44 jasynda qapııada kóz jumǵan Qaısar Málgajdarovty eske alý keshi ótti. Jıyn aldynda marqumnyń ómir, eńbek jolyna arnalǵan kórme uıymdastyrylyp, beınefılm kórsetildi. Sharada sóıleýshiler Qaısardyń adamgershilik, joldastyqqa berik, dosqa adal qasıetteri jaıly syr shertip, estelikter aıtty. Odan keıin onyń atyndaǵy qaıyrymdylyq qorynyń tusaýkeseri ótip, álemdik, respýblıkalyq jarystarda top jaryp júrgen bir top balǵyn sportshyǵa 50 myń teńgeniń sertıfıkaty men Qaısardyń otbasy jaıly jazylǵan «Altyn besik – moıa semıa» atty ǵumyrnamalyq kitap tartý etildi.
Jıyn sońynda marqumnyń apasy, oblystyq máslıhattyń depýtaty Baqytjan Sámıeva jınalǵandarǵa rızashylyq bildirip, qor maqsaty óńir sportshylaryna júıeli qarjylyq qoldaý kórsetýdi kózdeıtinin jetkizdi.
О́mir ESQALI,
«Egemen Qazaqstan».
Soltústik Qazaqstan oblysy.