Qazir attap bassań, lombardqa kezigesiń. Ásirese, mundaı mıkroqarjy uıymdary bazar mańynda kóptep shoǵyrlanǵan. Elimizde olardyń sany 600 shamasynda eken. Alaıda mıkronesıelerdiń úshten ekisi sol 600 uıymnyń tek úzdik 20-syna ǵana tıesili bolyp shyqty.
Al jeke tulǵalarǵa berilip, biraq tólenbegenine úsh aıdan asyp, qaýipti nesıeler qataryna kirgen qaryz mólsheri – lombardtar portfeliniń 5 paıyzyn quraıdy. 2021 jyldyń ekinshi toqsany sońyndaǵy jeke tulǵalarǵa berilgen mıkronesıe kólemi – 131 mlrd teńge. Bul rette salystyra keteıik, bıyl ekinshi toqsan sońynda jalpy mıkroqarjy uıymdarynyń jeke tulǵalarǵa bergen qaryzy 542,2 mlrd teńgeni qurasa, ekinshi deńgeıli bankterdiń tutynýshylyq nesıeleriniń kólemi 5,1 trln teńgege jetip jyǵylǵan.
Lombardtardyń jeke tulǵalarǵa bergen mıkronesıesiniń 93,8 mlrd teńgesi – taza, ıaǵnı tólemi keshikpegen qaryzdar. Al 37,2 mlrd teńge, ıaǵnı búkil zaımnyń 28,4 paıyzyna negizgi qaryz nemese qosylǵan syıaqy boıynsha tólemniń keshigip jatqany baıqalady. Keshiktirilgen mıkronesıelerdiń kóp bóligi – 1-30 kún aralyǵynda keshigip jatqan tólemder. Onyń kólemi – 22,9 mlrd teńge. Al tólenbegenine 31-den 60 kúnge deıin uzap ketken tólemder – 5,1 mlrd teńge bolsa, úsh aı boıy umytylǵan qaryz mólsheri 2,6 mlrd teńgeni mańaılaıdy. Al 90 kúnnen asyp tólenbegen zaımdar mólsheri – 6,5 mlrd teńge. Bul qaryz jeke tulǵalarǵa berilgen mıkrozaımdar kóleminiń 5 paıyzyn quraıdy.
Qarjy naryǵyn retteý jáne damytý agenttiginiń dereginshe, bıyl ekinshi toqsan sońynda elde 594 lombard jumys istegen. Mıkronesıe portfeli kólemi boıynsha «M-Lombard» (18,1 mlrd teńge) kósh bastaıdy, ekinshi orynda – «MK-Lombard» (12,7 mlrd teńge), úshinshi orynda – «Astra-Lombard» (11,2 mlrd teńge). Sondaı-aq jeke tulǵalardy nesıeleý boıynsha «Seıf Lombard» (11 mlrd teńge), «MK-Zoloto Lombard» jáne «Senimdi irgetas» (8,4 mlrd teńgeden) lombardtarynyń da úlesi joǵary.
Ranking málimeti boıynsha, birinshi jartyjyldyqta eldegi lombardtar 19 mlrd teńgeden astam taza jıyntyq paıda tapqan. Bul rette 116 lombard shyǵynǵa batqan. Jaqynda Ulttyq bank nesıe seriktestikteri jáne lombardtar boıynsha qarjy sektorynyń kórsetkishterin jarııalaýdy bastady. Aqparat Ulttyq bank saıtynda toqsanaralyq negizde jarııalanyp otyrmaq.
Qańtar-maýsym aralyǵynda lombardtardyń jıyntyq tabysy 68 mlrd teńgeden asypty. Onyń 43,7 mlrd teńgesi syıaqy alý arqyly paıda bolǵan tabystan túsken. Al qańtar-maýsym aralyǵyndaǵy shyǵyn 46,2 mlrd teńgeni quraıdy. Onyń 16,2 mlrd teńgesi – operasııalyq shyǵyndar. Sonymen qatar lombardtardyń korporatıvtik tabys salyǵynyń jıyntyq kólemi 2,8 mlrd teńgege shyqqan. Korporatıvtik salyq tólengenge deıingi taza tabys birinshi jartyjyldyqta 21,8 mlrd teńgege jetse, salyq tólengen soń onyń kólemi 19 mlrd teńge bolǵan.