Dástúrli ónerdiń dáýiri ótkenin suńǵyla sýretshi Djon Everett Mılle osydan eki ǵasyr buryn eskertken edi. Ashyq aspan aıasynda tabıǵat pen adamnyń jan tolǵanysyn bir-birimen baılanystyra otyryp jetkizgen qylqalam sheberiniń oı-órisi qalypqa syımaıdy. Sonysymen zamandastarynan erekshelenip turatyn da. Áıtpese, esi durys adam ımperııaǵa qarsy kele me? Senbeseńiz, Otanynyń gúli men qusyn sóıletken aǵylshyn perzentiniń osy bir shyǵarmasyna oıly kózben qarap kórińizshi?!
Sýretshi Djon Mılle «Ofelııa» kartınasyna negiz retinde Ýılıam Shekspırdiń «Gamlet» pesasynan sıýjet alady. Bul – súıiktisi ákesiniń qolynan ólgenin bilip, óz-ózine qol jumsaǵan qyzdyń ajal qushaǵyndaǵy beınesi. Munda onyń ózenge qulaǵan sáti berilgen. Arý muńly ánniń yrǵaǵyna terbelip bara jatqandaı. Eki qolyn qus qanatyndaı jaıyp jiberip, kóz janaryn aspanǵa qadaıdy. Sondyqtan onyń qalybyn kóptegen oqyrman aıqyshqa shegelengen Isa Másihpen baılanystyrady.
Ofelııa birte-birte erekshe tústermen taralǵan tumsa tabıǵattyń qoınyna súńgip bara jatqandaı. Súıgeninen aıyrylǵan sulýdyń júzinde qorqynysh ta, ýaıym da joq. Ol ómirmen tezirek qoshtasyp, ólimmen kezdesýge asyǵatyn sekildi.
Aǵylshyn sýretshisiniń bul týyndysy tek qana qyz taǵdyrynan habar bermeıdi, onda tabıǵat ta egjeı-tegjeı sýrettelgen. San alýan boıaýǵa oranǵan ósimdikter belgili bir sımvoldar retinde áreket etedi.
Qarańyzshy, sary maıly tús – adaldyqty bildiredi. Ofelııanyń betine ıilgen tal japyraqtary – mahabbattan baz keshken mezeti, qalaqaı – aýyrsyný, al túımedaq – qyzdyń kinásizdiginiń kórinisi.
Sýda júzgen raýshandar – dástúrli túrde mahabbat sımvoly. Kartınanyń buryshyna ornalastyrǵan shalǵyn – nonsens, maǵynasyz jas qyzdyń ólimi. Sý betinde qalqyp júrgen qyzyl adonıs – jannyń muń-zary, kóıleginiń etegindegi órnekter jaýapsyz mahabbattyń belgisi ispetti.
Mılleniń kartınasynda qoldanǵan reńkter óte tereń maǵynaǵa ıe. О́zenniń batpaq tárizdi kórinýi erteńgi kúnderiniń qarańǵylyqqa toly bolatynyn sıpattap tur. Al onyń aǵysy o dúnıeden habar beredi.
Sýretshi óz týyndysyn qalaı jazǵany qyzyq. Birinshiden, ol fon tańdaǵan, tabıǵat aıasynda birneshe saǵat boıy peızaj syzady. Sodan keıin sheberhanaǵa aýysady. Arnaıy shaqyrylǵan model sýyqqa tóze otyryp, vannada Ofelııa kúıinde uzaq jatqan eken. Bul aýyr da uzaq shyǵarmashylyq prosestiń bergi beti ǵana. Al ony jetkizýdegi avtordyń jan kúıi men sezimi qupııaǵa toly muhıt tárizdes. Tek ony ózinen basqa eshkim sezine almaıdy.