Búginde dástúrli túrde ótetin «Junior Eurovision-2021» halyqaralyq baıqaýyna ulttyq irikteý aıaqtaldy. Oza shapqan órenderdi atyn bilgińiz kelse, daýys berip, qoldaýyńyz shart.
Kezinde Erjan Maksım, Danelııa Týleshova, Qaraqat Bashanovanyń baǵyn jandyrǵan halyqaralyq án dodasy jaqyndap qaldy. Baıqaý bıyl 19 jeltoqsanda Parıjde ótedi.
Basty talap – qatysýshylar jasy 9 ben 14 jas aralyǵynda bolýy kerek. Baıraqty básekede elimizdiń atynan kimniń baq synaıtyny belgisiz. Ulttyq irikteýge kez kelgen qazaqstandyq qatysa alady. Baǵy men baby keliskenderdi qazylar alqasy irikteıdi. Oq boıy ozyp shyqqandy Parıj sahnasyna attandyrady.
Jalpy, «Balalar Eýrovıdenıesi-2021» halyqaralyq baıqaýyna qatysýǵa 819 ótinim kelip túsken. Endi qazylar alqasy solardyń ishinen úzdik degen 30 qatysýshyny anyqtaıdy.
«Junior Eurovision» – Qazaqstanda balalar shyǵarmashylyǵynyń halyqaralyq deńgeıde damýyna shabyt beretin aýqymdy joba. Ekinshiden, jas ónerpazdarǵa qanat bitiretin dúbirli doda. Elimizde ónerli balalardyń kóptigi qýantady. Búginde jas ónerpazdardyń talantyn tanytýǵa múmkindikter jetip jatyr, ınternet keńistigi de damyǵan. Sońǵy jyldary elimiz «Balalar Eýrovıdenıesinen abyroımen oralyp júrip júr. Oǵan Erjan Maksım men Qaraqat Bashanovanyń jetistigi dálel. Bıyl da otandyq ónerpaz el namysyn tıisti deńgeıde qorǵaıdy degen úmittemin», dedi qazylar alqasynyń múshesi, elimizge tanymal óner qaıratkeri Qanat Aıtbaev.
Uıymdastyrýshylardyń aıtýynsha, kelesi kezeńge ótetin 30 qatysýshynyń tizimi jevision.khabar.kz saıtynda jarııalanady. Jáne úmitkerlerge onlaın daýys berý búgin túngi 00.00-de bastalyp, 12 qazanǵa deıin jalǵasady.
Aıta keteıik, bıylǵy 19-shy «Junior Eurovision Song Contest» balalar án baıqaýyna 19 el qatysady. Olar: Albanııa, Armenııa, Ázerbaıjan, Bolgarııa, Fransııa, Grýzııa, Germanııa, Irlandııa, Italııa, Qazaqstan, Malta, Nıderland, Soltústik Makedonııa, Polsha, Portýgalııa, Reseı, Serbııa, Ispanııa jáne Ýkraına.