Aýǵanstannan kelgen aǵaıyndar

Kúzdiń óńmenińnen óter qara sýy­ǵy qaltyratqanymen, júrekti qýa­nysh oty jylytyp tur. Ol qýa­nysh – ata-babasynyń kindik qany tamǵan topyraqty ańsap alystan jetken qandastardy qarsy alý sáti. Júrdek poıyzdan aldymen tompańdap bala tústi. Jaqsy yrymǵa baladyq: bala­qaı­dyń bolashaǵy atajurtynda búr jarmaq. Atbasar aýdany ákiminiń orynbasary Qýanysh О́mirzaq ústin­de­gi jyly kúrtesin sheship alyp kúzgi yzǵardan sál tońazyǵan balanyń ıy­ǵy­na japty. Kúrte emes, alys­tan jetken aǵaıynǵa degen jalpaq jurttyń ystyq yqylasy osylaı meń­ze­lip kór­se­tilgendeı boldy.

Oblysqa taban tiregen otbasy­lar­dyń quramynda 35 adam bar. Olardyń 21-i er-azamat bolsa, 14-i áıelder. Ara­larynda kishkentaı náreste de bar.

– «Eńbek» memlekettik baǵ­dar­lamasy aıasynda qandas­tary­myz­ǵa barlyq jaǵdaı jasalady, – dedi ob­­lystyq Jumyspen qamtý jáne áleý­mettik baǵdarlamalardy úı­les­tirý basqarmasynyń basshysy Dına Ahmetjanova. – Turǵyn úı máselesi demeýshilerdiń kómegimen sheshilmek. Jańa ortaǵa beıimdelip ketkenshe teologter men psıhılogter kómek kórsetedi.

Leıla Ozbakıdiń otbasy Kókshetaý qala­syndaǵy «Novopek» kom­pa­nııa­sy­nyń jataqhanasyna ornalas­ty­ryp, eńbekke jaramdy adamdar jumyspen qamtylyp, balalary «Qarlyǵash» bala­baqshasy men №18 orta mektepke baratyn boldy. Atbasarǵa quramynda 12 adamy bar Ahmadı Mohammad Hanıftiń otbasy qonystanbaq. Olar Marınovka aýylyndaǵy 120 sharshy metrlik bes bólmeli úıde turatyn bolady. Býrabaıǵa bet alǵan qandastar Kindikqaraǵaı aýylynda irge teýip, sharýa qojalyqtarynda jumys iste­mek. Qaımaǵy buzylmaǵan qazaq aýy­ly­nyń keregesi qandastarmen ke­ńeıetin boldy. Derman Malıhanyń otbasy Sandyqtaý aýdanynyń Vese­loe aýylyna bet aldy. Eresekter «Baı­daly» jaýapkershiligi shekteýli seriktestigine ornalastyrylady. Balalary qazaq tilinde tálim-tárbıe beretin mektepke beriledi.

Jumysqa jaramdy aǵaıyndardyń barlyǵy jumyspen qamtylsa, mektep jasyndaǵy balalarǵa jalpy bilim be­rý qory arqyly qajetti kıim-keshek, oqý quraldary bólinetin bol­dy. Qı­ly zamanda shekara asyp, shermende bolǵan qandastarymyzdyń búgingi ur­paǵynyń atajurtta tamyr jaıýyna barlyq jaǵdaı jasalmaq.