«Asyl dombyra» kimge buıyrdy?

Alaman aıtysqa tórt irik­teý kezeńinen súrinbeı ótken 18 aqyn qatysty. Jyr doda­nyń basty ereksheligi aqyn­dardyń juby jurt aldynda jerebemen anyqtalyp otyr­dy. Jyl basynan beri 4 ke­zeńnen órbigen irikteýge bar­lyǵy 47 aqyn qatysqan bolatyn. Aıtys aqyndary men jyrshy-termeshiler odaǵynyń tóraǵasy Júrsin Erman bul aıtys tarıhynda buryn-sońdy bolmaǵan kórsetkish ekenin, osy joba eń aýqymdy báseke bolǵanyn aıtady.

Aýzymen qus tistegen aqyn­dar óz jyryna táýelsizdik je­tis­tikterin, ult murasy men urpaq taǵylymyn arqaý etti. Kezi kelgende qoǵamdaǵy túıt­kildi problemalardy túırep aıtyp, jyrsúıer aǵaıyn­nyń kóńilinen shyqty. Qa­zaqstannyń Eńbek Eri Asanáli Áshimov tór­aǵalyq etken qazylar al­qasyna naǵyz jeńimpazdy anyqtaý ońaıǵa soqqan joq. Tapqyrlyq, ut­qyr­lyq, kór­kemdik, sýyryp sa­lý aıtysty baǵalaýdyń basty talaby retinde qoıyldy.

Sóz barymtasynda oramdy oı, aıshyqty tirkesimen kórermen kózaıymyna aı­nalǵan almatylyq Qaziret Berdihan asyl tastarmen kóm­kerilgen aıryqsha dom­byranyń ıegeri atanyp, ASSYL DOMBYRA aıty­sy­nyń jeńimpazy dep ta­nyldy. Aıtys sahnasyn­da ózine tán órnegi bar qyzyl­ordalyq Muhtar Nııazov II oryndy enshilese, eki III oryn óskemendik Serik Qýanǵan men Syr óńiriniń týmasy júırik aqyn Meıirbek Sultanhanǵa buıyrdy.

Qazylar alqasynyń sheshi­mimen Shuǵaıyp Sezimhan, Aıbek Jeńisqazın, Nurlan Esen­qulov qatarly úsh aqynǵa ynta­landyrý syılyǵy berildi.

Al quny 2 mln 400 myń teńgeni quraıtyn ASSYLTAS stıpendııasy Rınat Zaıytovqa berildi.

«Aıtys – ejelden kele jat­qan asyl muramyz. Bul óner­diń álem úshin de orny bólek. Son­dyqtan IýNESKO aıtys­ty adamzattyń mádenı mura­larynyń tizimine qo­syp otyr. Bıylǵy ASSYL DOMBYRA aqyndar aıtysy Táýelsizdiktiń 30 jyldyǵy men Júrsin Ermannyń 70 jas mereıtoıy­na oraı ótkizildi. Sondaı-aq ár irikteý kezeńi Jambyl Jabaevtyń 175 jyl­dyǵyna, Muqaǵalıdyń 90 jas mereıtoıy men Qasym Aman­jolovtyń 110 jyl­dy­ǵyna da arnaldy. Sýper fınalda aqyndar qoǵam­daǵy ózek­ti problemalar­dy qozǵap, kó­rermender naǵyz aıtystyń kýási boldy. Sebebi aqtyq báse­kede kil myqtylar óner kór­setti. Kórermen naǵyz tar­tys­­qa toly bıik deńgeıdegi aı­­tys­tardyń kýási boldy», deıdi ASSYLTAS qoǵamdyq qo­rynyń quryltaıshysy Dýlat Tástekeev.