Qazaq eli! Ejelden bergi el armany emes pe edi bul! Tipti osy bir qazaq eli men qazaq jeri degen qasıetti qos uǵym úshin ata-babalarymyz attan túspeı jaýmen arpalysyp,talaı bir tar jol taıǵaq keshýdi bastarynan da ótkizgendikterin kóne tarıh ta joqqa shyǵara almasy anyq.Elimiz, myna siz biz «Qazaqstan» degen atpen de talaı bir asýlardan da astyq. Alaıda, sezine bilgen janǵa «qazaǵyn» bylaı qoıa turyp aıtar bolsaq, osy bir «stan» degen sózden áldebir salqyndyq esip turatyny bar. «Stan» degenińiz tipti kim kóringenniń bir túnep keter jataǵy sııaqty uǵymǵa jaqyndaý ma dep qalamyn. Jáne de kim kóringenniń bıligi men ámiri júrer, naqtyly ıesi joq el degenge de saıatyny bar.
Endi biz dúnıege tanylǵan egemen elmiz! Jáne de álemdik saıasatta da, álemdik qaýymdastyqta da ózimizge laıyqty ornymyz bar abyroıly da aıbyndy elmiz! Qazaqstan Respýblıkasynyń Tuńǵysh Prezıdenti, Elbasy Nursultan Nazarbaevtyń el taǵdyryn, táýelsizdigimizdiń taǵdyryn keńinen piship kele jatqan kemel de kóregen saıasatynyń arqasynda álemniń damyǵan 50 elderiniń qatarynan oryn alyp otyrǵan elmiz! Biz endi 2050 jylǵa deıingi damý baǵytymyzdy aıqyndap, álemniń eń damyǵan qýatty 30 eliniń qataryna turýdy maqsat etken elmiz! «Biz úshin bolashaǵymyzǵa baǵdar etetin, ultty uıystyryp, uly maqsattarǵa jeteleıtin ıdeıa bar. Ol Máńgilik El ıdeıasy» – Elbasynyń halyqqa arnaǵan Joldaýynda aıtylǵan osy bir aýyz sóz bizdiń barshamyzdyń kókeıimizde jatqan, tipti bizdi qoıyp san ǵasyrlar boıy babalarymyzdyń kókeıinde ketken armandy tilekti nıeti edi. Endi mine, Jaratqan Iemiz ońǵaryp, Elbasy ózi bastap, halqymyz qoldap biz Máńgilik El bolýdy murat tutyp, bul uly maqsatty ulttyń uly strategııalyq maqsaty retinde alǵa tarttyq. Biz ózimizdiń keleshegimizge, ózimizdiń alǵa qoıyp otyrǵan is josparlarymyzdyń jasampazdyǵyna senip baryp Máńgilik El bolamyz dep tórtkúl dúnıege málimdeme jasap otyrmyz. Endi maqsat aıqyn, oı da anyq, ıdeıa da bar! Bizge endi osy bir uly muratqa jetip, Máńgilik El bolý úshin Elbasynyń tóńiregine tyǵyz toptasyp, birligimizdi saqtap, tilimiz ben dinimizge berik bolyp, elimizdegi ındýstrııalandyrý baǵdarlamasyn oıdaǵydaı etip, sapaly oryndaý, bilim men ǵylymdy damytý jáne jan aıamaı eńbek etý qaldy! Eń bastysy, Elbasy Nursultan Nazarbaev Máńgilik Eldiń irgetasyn qalap, Máńgilik Eldiń Astanasyn jańadan salyp, Qazaq eliniń álemdik ekonomıkadaǵy da, saıasattaǵy da ózine laıyqty ornyn oıyp turyp alyp berdi! Bul sóz talastyrýdy qajet etpeıtin tarıhı aqıqat!
Biz osy bir oı tujyrymymyzben bólisýdegi maqsatymyz Elbasynyń jýyrda Atyraý qalasynda bolǵan sapary kezinde jurtshylyqpen kezdesý barysynda Qazaqstandy endigi arada «Qazaq eli» dep ataý jóninde oı tastaǵan sóziniń kókeıimizden shyqqandyǵyn aıtý bolatyn. Elbasy bul oıdy 2013 jylǵy óz Joldaýynda ortaǵa tastaǵan edi. Endi sol ortaǵa salynǵan oıdyń júzege asyrylatyn kezi de kelgen syńaıly. Árıne, Elbasy bul máseleniń áýeli el talqysyna salynatyndyǵyn da aıtyp ótti. Bul másele el talqysyna salynar bolsa barsha qazaqstandyqtardyń bul máseleni, ıaǵnı, Qazaqstannyń «Qazaq eli» atanýyn jaqtap, qoldaıtyndyqtary da sózsiz degen kóńilde bir senim bar.
Jabal ERǴALIEV,
jazýshy, Qazaqstannyń eńbek sińirgen qaıratkeri,
Qazaqstan Respýblıkasy Parlamenti Senatynyń depýtaty.