Aqtaý qalasyndaǵy Nazarbaev zııatkerlik mektebiniń 12-synyp oqýshysy Erlan Turaly men fızıka pániniń muǵalimi Lızaveta Hamıtova birlese jasaǵan Hydropanel jobasy avtorlyq quqyqqa ıe boldy. Bul qondyrǵy – Mańǵystaý oblysyndaǵy aýyzsý qajettiligin joıýǵa kómekshi qural.
Ol aýa temperatýrasynyń kúrt ózgerisinen sý jınaıdy jáne kún panelderi arqyly elektr energııasyn óndiredi.
– Bizdiń qurylǵymyz qoljetimdi jabdyqtardan turady jáne kún energııasyn sýǵa býlaný prosesi arqyly aınaldyrady. Aýa ylǵaldylyǵy men temperatýra artqan saıyn qurylǵy sýdy kóp óndiredi. Synaq barysynda qurylǵymyzdyń sýdy jınaı alatyndyǵyna kóz jetkizdik, – deıdi joba jetekshisi Lızaveta Hamıtova.
Onyń aıtýynsha, qoldan jasalǵan qurylǵy bir kúnde jarty staqan sýǵa deıin jınaı alady.
– Ázirge tek qurylǵynyń mını-prototıpi jasaldy. Eger ony naqty júzege asyratyn bolsa, jobanyń quny 2 mln teńgeni quraıdy jáne kúnine 10 lıtr sý jınaý múmkindigi bolady, – deıdi jas zertteýshi Erlan Turaly.
Zertteýshiler jobany eki jyl boıy jasaqtap, tolyqtyrýlar engizgen. Al ótken aıdyń basynda jobanyń avtorlyq quqyǵyn qorǵaý maqsatynda ótinim bildirgen.
– Bolashaqta bul qurylǵyny úlkeıtip jasaqtap, ony mektep alańyna jáne qala kóshelerine qoıǵymyz keledi. Bul kóshede shóldep kele jatqan turǵyndarǵa óte úlken kómek bolar edi. Sol úshin de avtorlyq quqyq kýáligin aldyq. Aldaǵy ýaqytta jobamyzdy patentke de usynyp kóremiz, – deıdi zııatker oqýshy.