Atyraýda alkogoldik ishimdik iship, kólik rýline otyratyndar azaıar emes. Ashy sýdyń jeligi me, álde júgensizdik pe, jyl basynan beri osyndaı 500-ge jýyq mas júrgizýshi anyqtalǵan. Kólikti mas kúıde basqarǵan 9 júrgizýshi bir túnde ustaldy. Olardyń kóligi arnaýly turaqqa qoıylǵan. Bári de 7 jylǵa júrgizýshi kýáliginen aıyrylyp, sot sheshimimen 15 táýlikke ákimshilik qamaýǵa alyndy.
– Patýrldik polısııa qyzmetkerleri sondaı júrgizýshiniń birin 25 qyrkúıekte saǵat 04:10 shamasynda Atyraý qalasyndaǵy A.Vladımırskıı kóshesinde toqtatty. Cadillac Escalade markaly kóligin tekserý kezinde rólde otyrǵan 1983 jylǵy júrgizýshiden ishimdiktiń ıisi baıqalǵan. Medısınalyq saraptamanyń korytyndysymen onyń jeńil dárejede mas ekeni anyqtaldy. Oǵan qatysty Ákimshilik quqyqbuzýshylyq týraly kodeksiniń 608-babynyń 1-bóligimen (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarǵany úshin) ákimshilik hattama toltyryldy, – dep habarlady departamenttiń baspasóz qyzmeti.
Osyndaı taǵy bir derekke júginsek, 8 qazanda saǵat 02:30 shamasynda jedel basqarý ortalyǵynyń beınebaqylaý qyzmetkerleri Atyraý qalasyndaǵy A.Vladımırskıı kóshesinde kúdik týdyrǵan Toyota RAV4 markaly avtokóligin baıqaǵan. Patrýldik polısııa qyzmetkerleri atalǵan kólikti toqtatyp, tekserý júrgizgende róldegi 1981 jylǵy júrgizýshiden ishimdiktiń ıisi shyqqan. Medısınalyq saraptamanyń qorytyndysymen 40 jastaǵy áıeldiń jeńil dárejedegi mas ekeni anyqtalyp otyr. Mas júrgizýshige qatysty Ákimshilik quqyqbuzýshylyq týraly Kodeksiniń 608-babynyń 1-bóligimen ákimshilik hattama toltyryldy. Sot sheshimimen rýlge mas kúıde otyrǵan áıel 7 jylǵa kólik quralyn basqarý quqyǵynan aıyrylyp, 15 kúnge ákimshilik qamaýǵa alyndy.
Al oblystyq sottyń baspasóz qyzmeti usynǵan málimetke súıensek, bıylǵy toǵyz aıda Qylmystyq kodeksiniń 346-babymen (Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol berý) 38 júrgizýshiniń isi sotta qaraldy.
– Onyń ishinde 30 adam bas bostandyǵynan aıyrylyp, 8 adam bas bostandyǵynan shekteý jazasyna sottaldy. Sondaı-aq Ákimshilik quqyqbuzýshylyq týraly kodeksiniń 608-babyna sáıkes 675 adamǵa qatysty ákimshilik quqyq buzýshylyq týraly ister qaralǵan. Onyń ishinde 672 adamǵa ákimshilik jaza qoldanylyp, 3 adamǵa qatysty ákimshilik is júrgizý toqtatylǵan. Al 630 adam qamaqqa alyndy. Onyń ishinde 518 adamǵa qosymsha jaza retinde arnaıy quqyǵynan aıyrý sharasy qoldanyldy. Buǵan qosa 39 júrgizýshi arnaıy quqyǵynan aıyrylyp, 3 adamǵa aıyppul salyndy, – dep málim etti oblystyq sottyń baspasóz qyzmeti.