Syr boıyndaǵy Qazaly aýdanynyń tórt turǵyny tyń kásip túrin bastap jatyr. «Qazaly Agro KZ» jaýapkershiligi shekteýli seriktestigine toptasqan jigitter kádimgi shylaýshyn ósirýdi qolǵa alypty. Jerdiń qunaryn arttyrý úshin damyǵan elderde keń tanylǵan bul kásip túrin qazir Qazaqstannyń ár túkpirinde kádege jaratyp otyrǵandar kezdesedi.
Syr boıy úshin jańalyq sanalatyn jaýynqurt ósirip, tyńaıtqysh saýdalaýdy bastap ketken seriktes jigitter bul bıznestiń bolashaǵyna senedi. Jýyrda aýdan ákimi Muhtar Orazbaev osy kásipti qolǵa alǵan azamattarmen kezdesip, olardyń bolashaqtaǵy joba-josparymen tanysty.
Kásipker Sábıt Aralbaevtyń aıtýynsha, olar ósirip jatqan kalıfornııalyq qyzyl qurttyń qorshaǵan ortaǵa záredeı da zalaly joq, kerisinshe topyraǵyn sor basyp turatyn Syr óńiri úshin asa qajet bastama.
– Kalıfornııalyq qyzyl qurttardyń «tamaǵy» – organıkalyq qaldyqtar. Japyraqtyń shirindisin, maldyń tezegin talǵamaı jeı beredi. Ony óńdep, bıologııalyq tyńaıtqysh jasaıdy. Sondyqtan da onyń qoreginen kóp qınala qoımaımyz. Jer sorlanýdan bólek qurǵap ketkende de osy bıotyńaıtqyshtyń kómegi kóp, – deıdi kásipker.
Bul jándik 1959 jyly AQSh-tyń Kalıfornııa shtatynda jaýynqurttardyń ár túrin býdandastyrý arqyly paıda bolǵan. Bizdiń elimizge 2004 jyldan bastap kele bastady. Kádýilgi shylaýshynnan 5-6 ese tez kóbeıedi. Jergilikti jaýynqurttar 3-4 jyl, al kalıfornııalyq túri 16 jyl ómir súredi. Qurt ósirýdi qolǵa alǵan azamattar aldaǵy ýaqytta 15 gektar aýmaqqa jylyjaı salýǵa bel býyp otyr. Tek bul úshin ınfraqurylym qajet. Kásipkerler aýdan ákimi Muhtar Orazbaevqa osy jaǵynan kómek berip, qoldaý kórsetýin surady. Aýdan basshysy tyń is bastaǵan talapty jigitterge kómek kórsetýge ýáde berdi.