El Táýelsizdiginiń 30 jyldyǵyna oraı Jambyl oblysynyń ákimi Berdibek Saparbaevtyń bastamasymen Taraz qalasynda «Anaǵa taǵzym» ortalyǵy ashyldy. Atalǵan ortalyq «Tarazǵa tartý» jobasy aıasynda boı kótergen. Bul nysandy «AraıStroıMarket» JShS dırektory Arman Edilbaev óz qarajatyna salyp berip otyr. Ortalyq zaman talabyna saı salynyp, ulttyq naqyshta bezendirilgen. Jumys isteýge barlyq múmkindik bar. Al aldyna aqjaýlyqty analardyń qurmetine eńseli eskertkish ornatylǵan.
«Anaǵa taǵzym» ortalyǵynyń ashylýyna qatysqan oblys ákimi B.Saparbaev ótkenniń ónegesin búgingi jas býynnyń boıyna sińirý kerektigin aıtyp, ortalyqtyń aldaǵy ýaqytta atqaratyn jumysyna toqtaldy. «Qandaı zamanda da abzal analarymyz halyqpen birge erlerine súıenish, eline tirek bola bilgen. Aısha bıbi, Qyz Jibek, Mánshúk, Álııa sekildi kóptegen tulǵalar el ómirinde oıyp turyp oryn alady. Nebir qıyn-qystaý kezeńderde de analarymyz tek otbasynyń uıytqysy bolyp qana qoımaı, aýyrlyqty eńserýge belsene aralasty. Babalarymyzdan qalǵan «Áke uldy tárbıeleıdi, ana tutas ultty tárbıeleıdi», degen asyl sóz bar. Ana men balany qoldaý, otbasylyq qundylyqtardy nyǵaıtý jáne damytý – memlekettiń áleýmettik saıasatynyń basty baǵyttarynyń biri. Osy oraıda paıdalanýǵa berilip otyrǵan «Anaǵa taǵzym» ortalyǵy bir jaǵynan sulýlyq pen izgiliktiń beınesi, ekinshi jaǵynan tutas elimizdiń damýyna uıytqy bolar qazaqtyń anasy degen atqa laıyq XXI ǵasyr áıeliniń qalyptasýyna yqpal etedi dep oılaımyn. Bul jer ardaqty áıel-analarymyz ben qyz-kelinshekterimiz úshin ultymyzdyń qundylyqtaryn dáripteı otyryp, qazirgi zamannyń talabyna saı qasıetterdi boıyna sińiretin basqosý alańy bolady dep esepteımin», dedi. Sonymen qatar B.Saparbaev nysandy salyp bergen kásipker Arman Edilbaevqa jambyldyqtardyń atynan alǵys aıtty. Sondaı-aq kópbalaly jáne az qamtylǵan analardyń máselelerine qulaq túrip, olardy sheshý jolyndaǵy ortalyqtyń atqaratyn qyzmetine toqtaldy. Usynys, oı-pikirler de barynsha eskeriletin bolady. Tipti, qajet bolǵan jaǵdaıda jergilikti atqarýshy organdardyń ókil-deri de osynda shaqyrtylyp, túrli másele boıynsha qabyldaýlar men kezdesýler ótkiziledi.
Memlekettik syılyqtyń laýreaty, «Qunanbaı» fılminde Abaıdyń ájesi Zereniń beınesin somdaǵan aktrısa Nursıfat Salyqova óz sózinde aqylman, danagóı uly analardyń izgi jolyn dáripteı otyryp, jas urpaqqa, onyń ishinde qyz balalarǵa rýhanı-adamgershilik turǵyda tárbıe berýdi maqsat etken ortalyq jumysyna sáttilik tilep, aq batasyn berdi. Sonymen qatar saltanatty sharaǵa el anasyna aınalǵan tanymal tulǵalar men elimizge belgili azamattardy dúnıege ákelgen ardaqty analar, sport pen ónerdegi qyz-kelinshekter, sondaı-aq kásipker áıelder men qoǵam belsendileri qatysty. Kópbalaly ana Sapýra Erjanova óńirdegi analarǵa aıryqsha kóńil bólip otyrǵan Memleket basshysyna, oblys ákimine rızashylyǵyn jetkizdi. Budan keıin qonaqtarǵa ǵımarattyń qurylymy tanystyrylyp, qazaqy dástúrmen tusaýkeser rásimi ótti. «AraıStroıMarket» JShS bıznestiń áleýmettik jaýapkershiligi aıasynda syıǵa tartqan úsh qabatty ǵımarattyń barlyq zaly, dálizi ulttyq naqyshta bezendirilgen. Atalǵan ortalyqta jas jáne kópbalaly analar úshin túrli kýrstar uıymdastyrylyp, olarǵa psıhologııalyq jáne quqyqtyq turǵydan jan-jaqty qoldaý kórsetiledi. Ortalyqtaǵy «Mıras» ekspozısııalyq zalynda ulttyq salt-dástúr barynsha nasıhattalady. «Anaǵa taǵzym» ortalyǵynyń dırektory Elmıra Myrza-Ǵalıdiń aıtýynsha, munda «Syrǵalym» syrlasý klýby, «Erke sylqym» horeografııalyq zaly, «Qyzǵaldaq» ulttyq ekotárbıe klýby, «Syrly álem» beıneleý óneri jáne «Ana tili» sheshendik óner mektepteri, «Qazyna» ulttyq aspaptar synyby, «Yntymaq» kovorkıng zaly, «Bereke» aspazdyq, «Boıtumar» qolóner jáne dızaın stýdııalary jumys isteıdi.