Almaty qalasynyń ákimi Ahmetjan Esimov eldegi teńge baǵamynyń ózgerýine baılanysty qaladaǵy saýda núkteleriniń qyzmet aqysyn turaqty ustap turý jaǵdaıyn tekserý maqsatynda birqatar nysandardy aralap kórdi.
Qalada ornalasqan iri saýda ortalyqtary men dárihanalarda, janarmaı beketterinde bolǵan qala basshysy baǵa turaqtylyǵy men qalypty saýda-sattyq jaǵdaıyna qanyqqannan keıin teńge baǵamyn ońtaılandyrýǵa baılanysty ákimdikte qozǵalǵan másele men áleýmettik ahýaldyń jaı-kúıi barysynda jıylǵan kópshilikke aıtyp berdi. Ras, seısenbiniń keshinde jekelegen saýda ortalyqtarynda birinshi kezekte halyq tutynatyn taýarlardy el talap alypty degen qańqý sóz taraǵan bolatyn. Alaıda, ol áńgimeniń negizsiz ekendigin, el arasyndaǵy alypqashty sóz ekendigin eskertken qala ákimi eshqandaı dúrbeleń týdyrýǵa sebep joq ekenin eskertti.
– Memleket únemi kásipkerlikti qoldap kele jatqany barshańyzǵa aıan. Qazir biz halqymyz eleńdep otyrǵan tusta ózimizdiń kásipkerlerimiz jeke basynyń qamy úshin paıda kózdemeıdi dep senemiz. Osyǵan oraı, qala aýmaǵynda zańsyz baǵa ósirý áreketterin boldyrmas úshin biz barlyq zańǵa saı talaptardy qadaǵalaıtyn bolamyz, – dedi Ahmetjan Esimov jýrnalısterge bergen shaǵyn suhbatynda.
Elimizdegi teńge baǵamyna túzetý engizý máselesine oraı Almaty qalasy ákimdiginde arnaıy jıyn ótip, onda qala aýmaǵyndaǵy saýda oryndary men halyqqa qyzmet kórsetý oryndarynda qasaqana baǵa kóterý áreketteriniń oryn almaýy qatań tapsyrylǵan bolatyn. Soǵan oraı, qala boıynsha barlyq aýdandyq ákimdikterdiń ǵalamtor saıttarynda arnaıy rýbrıkalar ashylyp, ol jerge qarapaıym halyq tarapynan túrli aqparattar túsý júıesi jasaqtaldy. Qaladaǵy kez kelgen saýda núktesinde taýar baǵasyn ósirý faktisi oryn alsa, árbir turǵyn atalmysh dúkenniń mekenjaıy men taýar túrin ákimdik janynan ashylǵan arnaıy saıtqa bere alady. Nátıjesinde aýdandyq ákimdik janynan qurylǵan arnaıy top baǵany qasaqana ósirip otyrǵan dúkenge baryp, máseleni anyqtaýǵa tas-túıin daıyn otyr.
Budan ózge, qala ákimdiginiń uıymdastyrýymen jýrnalıstik top Almaty qalasy aýmaǵynda jumys istep turǵan «Almaty» áleýmettik-kásipkerlik korporasııasy» ulttyq kompanııasy» AQ turaqtandyrý qorynyń saýda núktelerin – áleýmettik dúkenderin aralap kórdi. Atalmysh qor qalada halyq birinshi kezekte tutynatyn taýarlar baǵasy negizsiz ósip ketý nemese kúrt ózgerý jaǵdaıynda elge qajetti taýardy qoljetimdi baǵamen usyný maqsatynda qurylǵan bolatyn.
Azyq-túlik taýarlarynyń aımaqtyq turaqtandyrý qory degenimiz – Almaty qalasynda áleýmettik mańyzdy ónim túrlerine baǵanyń negizsiz ósip ketýine jol bermeý sharasyn aldyn ala qolǵa alý úshin jasaqtalǵan operatıvti taýar qory. Turaqtandyrý qoryn qalyptastyrý men paıdalaný máselelerin sheshý úshin qalanyń túrli qoǵamdyq birlestikteriniń ókilderi, memlekettik organ jetekshilerimen birge osy turaqtandyrý qorynyń komıssııasy qurylǵan edi. Qordyń azyq-túlik bazasy qatań qadaǵalanýmen qatar, yqtımal jaǵdaılarda jedel áreket etý mehanızmi de durys jolǵa qoıylǵan. Bul qordy únemi tolyqtyryp otyrý úshin aýylsharýashylyq ónimderi men turmysqa asa qajetti taýarlar otandyq óndirýshilerden satyp alynady.
Almaty qalasy azyq-túlik taýarlarynyń aımaqtyq turaqtandyrý qoryn basqarý komıssııasy bekitken tizbe men kólemge sáıkes bıylǵy jyly jalpy kólemi 16 502 tonna azyq-túlik taýarlary satyp alynǵan. Onyń ishinde azyq-túliktiń kókónis jáne unnan jasalatyn túrleri bar.
– Qazirgi tańda qala aýmaǵynda halyqqa qajetti ónim men taýarlar kestesi jasalǵan 19 pavılon, 23 arnaıy jasaqtalǵan shatyr jumys istep tur. Bulardyń barlyǵynda baǵa turaqty jáne bazar naryǵynan 10-15 paıyzǵa tómen. Máselen, kartop baǵasy – 75, sábiz – 65, pııaz 55 teńge. Negizinen bizdi aýylsharýashylyq ónimimen Almaty oblysy, Jambyl, Ońtústik Qazaqstan jáne Pavlodar óńirleri qamtamasyz etip keledi, – deıdi «Almaty-azyq» áleýmettik dúkender jelisiniń bas dırektory Jarqyn Sársembaev.
Turaqtandyrý qorynyń ónim bazasynan azyq-túlik satý isi Almaty qalasynyń barlyq aýdandarynda ornalasqan saýda pavılondary men arnaıy shatyrlarda, sondaı-aq, qala aýmaǵynda ornalasqan kóterme saýda qoımasy arqyly áleýmettik-kásipkerlik korporasııamen enshiles «Almaty Azyq» JShS-niń saýda jelileri arqyly elge taralady. Jazǵy maýsymda qala aýdandarynyń jekelegen alańdarynda aýylsharýashylyq jármeńkesi túrinde de jeńildetilgen baǵamen halyqqa qyzmet kórsetilip kele jatyr.
Qanat ESKENDIR,
«Egemen Qazaqstan».
ALMATY.
--------------------------------
Sýretti túsirgen Sársenbek QYZAIBEKULY.