Jambyl oblysynyń ákimi Kárim Kókirekbaev selektorlyq keńes barysynda AQSh dollaryna qatysty teńge baǵamynyń ózgerýine baılanysty memlekettik mekemelerdiń basshylaryna azyq-túlik taýarlarynyń baǵasyn qadaǵalaýdy qatań túrde tapsyrdy.
Soǵan oraı, oblystyq shtab qurylyp, óz jumysyn bastady. Atalǵan shtab negizgi azyq-túlik taýarlary, janar-jaǵarmaı, dári-dármektiń baǵasyn qatań qadaǵalaıtyn bolady. Sonymen qatar, aqsha aıyrbastaý pýnktterinde alypsatarlyq áreketterdi boldyrmaý maqsatynda arnaıy jumys júrgizedi. Mundaı shtabtar oblystyń barlyq aýdandarynda jumys istemek.
Oblys ákiminiń tapsyrmasyna sáıkes qurylǵan shtabtyń jumysyn baqylaý oblys ákiminiń birinshi orynbasary Bekbolat Orynbekovke tapsyryldy. Sonymen birge, oblys ákiminiń orynbasary Ǵalı Esqalıevke janar-jaǵarmaı baǵasyn baqylaý, oblys ákiminiń orynbasary Erqanat Manjýovqa dári-dármek baǵalaryn baqylaýmen qatar, aqsha aıyrbastaý pýnktterimen jumys jasaý júkteldi.
Oblys ákiminiń birinshi orynbasary Bekbolat Orynbekovtiń tóraǵalyǵymen atalǵan másele boıynsha Taraz qalasy jáne aýdan ákimderiniń qatysýymen keńeıtilgen selektorlyq jınalys bolyp, taǵy bir pysyqtaldy. Taqyryp – negizgi azyq-túlik taýarlaryna kúndelikti monıtorıng jasap, aımaq basshysyna aqparat berip otyrý.
Kósemáli SÁTTIBAIULY,
«Egemen Qazaqstan».
Jambyl oblysy.