О́ńirdiń epıdemııalyq ahýaly jaqsaryp, indet juqtyrǵandar sany edáýir azaıǵanymen, dárigerler sońǵy ýaqytta ınfeksııalyq ortalyqqa kelip túsken naýqastardyń dertine kópke deıin em darymaı jatqanyn aıtyp otyr.
Qostanaı oblystyq aýrýhanasynyń bas dárigeri Iýrıı Moıseev qazir ınfeksııalyq bólimderdegi 180 naýqastyń 70 paıyzy aýyr jáne ortasha aýyr halde jatqanyn jetkizdi.
– Olardyń bári ottegi terapııasyn alýda. Qazir jansaqtaý bóliminde 20 shaqty naýqas jatyr. Sońǵy kezderi Covid-19 sozylmaly sıpatqa ıe bolyp barady. Aýrýhanaǵa túsken naýqastardyń bir aıdan keıin ǵana beti beri qaraı bastaıdy. Aıyǵyp shyqqan soń, derti qaıta asqynyp, qaıtadan aýrýhanaǵa túsip jatqandar kóp. Gospıtalda jatqandardyń 90%-y – vaksına qabyldamaǵandar. Vaksına qabyldaǵandar biren-saran ǵana, – dedi Iý.Moıseev.
Bas dáriger ınfeksııalyq stasıonarda jatqan naýqastardyń deni 50 jastan asqan adamdar ekenin, bul jasta indet jutyrý qaýpi joǵary bolatynyn, sondyqtan elýdi eńsergender eń birinshi kezekte indetke qarsy ekpe alý kerektigin qadap aıtty.
Oblystyq densaýlyq saqtaý basqarmasynyń málimetinshe, búginde ınfeksııalyq stasıonarlarǵa qoıylǵan 1 665 tósektik orynnyń 1 035-i bos tur. Indet juqtyrǵan 417 balany dárigerler ambýlatorııalyq baqylaýǵa alǵan. Qazir oblysta Tobyl qalasyndaǵy týberkýlezge qarsy dıspanser men oblystyq psıhıkalyq ortalyqtan ózge emdeý mekemeleriniń bári qalypty tártipte jumys istep jatyr.