Keshe Premer-Mınıstrdiń birinshi orynbasary Baqytjan Saǵyntaevtyń tóraǵalyǵymen Ruqsat berý júıesin jetildirý máseleleri jónindegi vedomstvoaralyq komıssııanyń on birinshi otyrysy ótti, dep habarlady Premer-Mınıstrdiń baspasóz qyzmeti.
Otyrysta bıznestiń damýyna kedergi keltiretin normalardy joıý turǵysynda zańnamalarǵa revızııa jasaý máseleleri qaraldy. Memleket basshysy «Qazaqstan joly – 2050: bir maqsat, bir múdde, bir bolashaq» atty Qazaqstan halqyna Joldaýynda osyndaı tapsyrma bergen bolatyn.
Komıssııa otyrysynyń qorytyndysynda 43 zańnamalyq normalardy joıý jáne qarapaıymdandyrý týraly sheshim qabyldandy.
Atap aıtqanda, Ákimshilik quqyq buzýshylyqtar týraly kodekske ruqsattar berý merzimin burmalaǵany jáne olardy berýden negizsiz bas tartqany úshin sheneýnikterdiń jaýapkershiligin belgileıtin túzetý qarastyrylýda.
Jer kodeksinde eldi mekender sheńberinde qurylys salýǵa jer telimderin alý prosedýrasy jeńildetiledi, «bir tereze» qaǵıdaty engiziledi, qujattardy berý merzimi qysqarady.
Onyń syrtynda Salyq kodeksinde alkogoldi ónimder jáne JJM satý salasyndaǵy qyzmetti júzege asyratyn kásipkerlerdi baqylaý-kassalyq mashına ornatýǵa mindetteıtin merzim 2014 jyldyń 1 shildesinen 2015 jyldyń 1 shildesine deıin uzartylatyn boldy.