Buǵan deıin de jazyp júrgenimizdeı, shahtalar kómir qabattaryndaǵy metan gazyn ıgilikke jaratý qaraǵandylyq kenshi ǵalymdar men mamandardy kópten oılantyp-tolǵantýshy ózekti másele bolyp keledi. Boljam boıynsha otyn keni óndiriletin tustarda onyń jalpy qory 1 trıllıon tekshe metrden asady eken. Bul bylaısha aıtqanda, Qaraǵandy tunyp turǵan taǵy bir baılyq kózin baýyryna basyp jatyr degen sóz. Álemniń 20 elindegideı kádege asyrylýy jolǵa tolyq qoıylsa, óńir ekonomıkasyna tıgizer yqpaly ushan-teńiz bolmaqtyǵy talassyz.
Keıingi on jylda óris alǵan metan gazyn barlaý, ony alý jumystary nátıjesin bere bastap otyr. Budan úsh jyl buryn Lenın atyndaǵy shahtada metan arqyly elektr qýatyn óndirý jobasy iske qosyldy. Sonyń arqasynda kásiporyn ózin-ózi energııamen 15-20 paıyzǵa qamtamasyz ete alatyn boldy. Osylaısha, qolda bardy uqsata bilý basqa da shahtalar qyzyǵýshylyǵyn týdyrdy. Esepteýlerge qaraǵanda qory 28 mlrd. tekshe metrdi quraıtyn Taldyqudyq pen Saran kómirli bólikterinde ıgerilýi kúnnen-kúnge ósýde. Elbasynyń metan gazyn óndirý jóninde Úkimetke bergen tapsyrmasyna sáıkes geologııalyq barlaý men zertteý is-sharalary keńinen júrgizilip jatyr. Jaqynda Sherýbaı-Nura, Qarajar-Shaqan ýchaskesinde de osynaý baılyq kózin óndiristik maqsatqa paıdalanýǵa jol salyndy.
Aıqyn NESIPBAI,
«Egemen Qazaqstan».
QARAǴANDY.