– Valıýtanyń baǵamyna ózgeris engizý týraly sheshim meniń oıymsha, eldiń ekonomıkasyna oń yqpal etedi. Birinshi kezekte taýar óndirýshi, onyń ishinde shyǵarǵan taýarlaryn syrtqa tasymaldaıtyn kásipkerlerdiń aıy ońynan týady dep senemin. Bul kásipkerlerge, kásiporyndarǵa jasalyp otyrǵan úlken qoldaý. Al kásipkerlik pen kásiporyndaryńyz ekonomıkanyń kúretamyry emes pe?
«Ordabasy Qus» JShS túıetaýyq etin eýropalyq standarttarǵa saı óndiretin kásiporyn. Shyǵarǵan taýarlarymyzdy alys, jaqyn shetelderge jiberemiz. Osy ýaqytqa deıin ishki naryqta reseılik, belorýssııalyq qus ónimderi basyp ketken bolatyn. Myna jaǵdaıdan keıin olar endi ishki naryqtaǵy básekege shydas bermeıdi. Jergilikti ónimderdiń kúsh-qýaty arta túsedi.
Ras, biz dollarǵa qatysty ózgeristen keıin jergilikti jerden shyǵatyn ónimderdiń baǵasynyń qymbattamaýyn qatań qadaǵalaýymyz kerek. Elbasy bul jóninde jaqsy aıtty. «Ekonomıkamyzdyń ıgiligine qyzmet etýi úshin barlyq qajetti sharalardy qabyldaǵan jón» dedi. Al kásipkerler úkimettiń bergen múmkindigin qur jibermeı paıdalanyp qalǵany jón. Eger eldegi kásiporyndardyń múmkindigi jaqsaryp, tynystary keńeıip jatsa, budan bári utady. Bul degenińiz qanshama jumys orny, eldiń ál-aýqaty. Sondyqtan, qabyldanǵan sheshim durys jáne ol búgingi kúnniń talabyna jaýap berdi dep esepteımin.
Murat TAǴAEV,
«Ordabasy Qus» JShS-niń bas dırektory.