Teńgeniń baǵamy ózgerýine baılanysty qarapaıym halyqtyń alǵashqyda abyrjyp qalǵany shyndyq. Ondaıda tutynýshylarǵa kommýnaldyq qyzmet kórsetetin kásiporyndardyń birden eske túsetini de belgili. Alaıda, qobaljıtyndaı eshteńe joq. Úkimet baǵanyń eriksiz ósýine jol bermeýdiń barlyq múmkindikterin qarastyrýda. Bizdiń mekeme tutynýshylarǵa elektr qýatyn jetkizýmen aınalysady. Biz óz tarapymyzdan AQSh dollarynyń teńgege shaqqandaǵy baǵamynyń kóterilýinen bizdiń jumysymyzǵa eshqandaı áser bolmaıtynyn jetkizgimiz keledi. Elektr qýatyn jetkizý burynǵy 3,85 teńge shamasynda ustalady. Buǵan bola eshbir alańdaýshylyq bolmaýy tıis. Bul baǵa ústimizdegi jyldyń aıaǵyna deıin bekitilip ketti. Endi ony eshkim de ózgerte almaıdy.
Al, mekemeniń josparly jumystaryna kelsek, olar da ýaqtyly atqarylatyn bolady. Bıylǵy jyly túsken paıdadan ınvestısııalyq baǵdarlamalardy júzege asyrýǵa 867900 myń teńge qaraldy. Buǵan kásiporynnyń qondyrǵylary jańartylady, qaıta jaraqtandyrylady. Sondaı-aq, ústimizdegi jyly 283300 myń teńgege kúrdeli jóndeý jumystary júrgiziledi. Shynyn aıtqanda, kóptegen materıaldardy elimizdiń kásiporyndarynan alamyz. Birqataryn Reseıden alamyz. Solardyń barlyǵymen qondyrǵylar men materıaldardy jetkizýge kelisimshart jasalyp qoıyldy. Olarǵa AQSh dollarynyń teńgege shaqqandaǵy kóterilýiniń eshqandaı da áseri bolmaıdy. Degenmen, keıbir baǵadaǵy aýytqýshylyqty óz kúshimizben sheshýdiń múmkindigi qarastyrylatynyn jasyrýdyń reti joq. Solaı bolǵannyń ózinde jyl aıaǵyna deıin biz jetkizgen elektr qýatynyń baǵasy qymbattamaıdy. Keıbireýlerdiń alypqashty sózderiniń negizi joq. Baǵa tarıfi ózgermeıdi, josparly jumystar ýaqtyly júrgiziledi. Bir sózben aıtqanda, mekemedegi qalypty jumys yrǵaǵy buzylmaıdy.
Marat AMANǴALIEV,
«Energosıstema» JShS bas ınjeneri.
Aqtóbe oblysy.