«Nur Otan» partııasy oblystyq fılıalynyń kezekten tys ótken HIH konferensııasynda «Qazaqstan joly – 2050: bir maqsat, bir múdde, bir bolashaq» atty Joldaý talaptarynan týyndaıtyn mindetter talqylanyp, Saıası keńestiń derbes quramyna ózgerister engizildi.
Birinshi másele boıynsha aımaq basshysy, «Nur Otan» partııasy jergilikti fılıalynyń tóraǵasy Samat Eskendirov baıandama jasady. Ol bıylǵy baǵdarlamalyq qujat aýqymdylyǵymen, naqtylyǵymen sıpattalatynyn, el damýynyń 2050 jylǵa deıingi jańa mindetteri men jaqyn keleshektegi strategııalyq kókjıekteri aıqyndalǵanyn, 30 memlekettiń qataryna ený eki kezeń boıynsha júzege asyrylatynyn atap ótti. Odan ári Joldaý partııanyń basty qujattarymen úılesim tapqanyna, bul oraıda, Saıası doktrınanyń orny erekshe ekenine, onyń basty saıası kúsh jáne Prezıdenttiń negizgi tiregi retindegi «Nur Otan» partııasynyń rólin aıqyndaıtynyna toqtaldy. Oblys qarqyndy damyp kele jatqan óńirler tobyna enip, Qazaqstan ekonomıkasynda mańyzdy oryn alady. Budan bylaı agrarlyq sektordyń biryńǵaı jelisin qurýǵa, ınnovasııalyq baǵytqa túsirýge basa mán beriletin bolady. Shaǵyn jáne orta bıznesti ındýstrııalyq jáne áleýmettik jańǵyrtýdyń basty quraly ete otyryp, bızneske qolaıly ahýal jasaý, 2050 jylǵa taman onyń ishki jalpy óniminiń 50 paıyzyna jetkizýge úles qosý – negizgi talaptardyń biri.
Baıandamashy Elbasy qazaqstandyqtardyń áleýetin ashatyn jańa múmkindikterdi belgilep bergenin, bul oraıda, sapaly bilim berý, densaýlyq saqtaý, mádenıet, áleýmettik salalarǵa tyń serpin qosý, memlekettik ınstıtýttar jumysyn jetildirý tapsyrmalaryn usynǵanyn jetkizdi. Memleket basshysy bıyl ekonomıka ósimin 6-7 paıyz deńgeıinde qamtamasyz etý, halyqtyń jan basyna shaqqandaǵy ishki jalpy ónim 14,5 myń dollardan kem bolmaý, ınflıasııany 3-4 paıyzǵa deıin tómendetý mindetterin qoıdy. Aýdandyq partııa uıymdaryna Joldaý qaǵıdattaryn júzege asyrý boıynsha is-sharalar josparyn ázirleýdi, úgit-nasıhat qyzmetterin jandandyrýdy, turǵyndarmen tikeleı baılanys ornatýǵa nazar aýdarýdy, máselelerdi sheshý joldaryn izdestirýdi, «Jas Otan» partııasy jastar qanaty qyzmetiniń belsendiligin arttyrýdy júktedi.
Konferensııada sóz alǵan oblystyq máslıhattyń depýtaty, «Mámbetov jáne K» KS bas dırektory Erkebulan Mámbetov bylaı dedi:
– Biz óndirý naryǵyn meńgergenmen, satýǵa kelgende deldaldarǵa táýeldi bolatynbyz. Endi ótkizý naryqtaryna tikeleı shyǵý júıesin qalyptastyrýǵa umtylys óte quptarlyq. Jıynǵa qos palata depýtattarynyń qatysýyn paıdalanyp, olardan shaǵyn sharýa qojalyqtarynyń kedergisiz damýy úshin ekologııalyq jáne salyq zańnamalaryna ózgerister engizý usynysyn qoldaýǵa shaqyramyn. Sonda álsiz sharýashylyqtardyń aıaqtarynan tik turyp, básekelestikke tótep berýine qolaıly jaǵdaı týar edi.
«Qazaq sańyraýlar qoǵamy» birlestigi oblystyq bólimshesiniń dırektory Vasılıı Mıronıak:
– «Nur Otan» partııasynyń qoldaýymen «Kedergisiz aımaq» jobasy qolǵa alynyp, múmkindigi shekteýli azamattarǵa kóbirek kóńil bóline bastaǵany qýantady. Elimizde 630 myńǵa jýyq múmkindigi shekteýli adam osy sanatqa jatqyzylsa, olardyń 15 paıyzy ǵana jumysqa tartylǵany oılandyrmaı qoımaıdy. Oblysta estý múmkindiginen aıyrylǵan 823 múgedek jan esepte tur. Bizdiń kásiporynda memlekettik tapsyrystyń kólemi shekteýli. Onyń mólsheri ulǵaıtylsa, taǵy da 50 múgedek jandy jumysqa qabyldaýǵa qaýqarlymyz, – dedi.
Basqa da sóıleýshiler turǵyndardyń ómir sapasyn, halyqqa kórsetiletin qyzmetterdiń tıimdiligin jaqsartý, osy zamanǵy áleýmettik qorǵaý júıesin nyǵaıtý, otandyq ónimder men buıymdardyń eksporttyq áleýetin arttyrý tóńireginde oı-pikirler almasty.
О́mir ESQALI,
«Egemen Qazaqstan».
Soltústik Qazaqstan oblysy.