Nıderlandtyń Zeıst qalasynda fýtzaldan 2022 jylǵy Eýropa chempıonatynyń toptyq kezeńine jerebe tartý rásimi ótti. Nátıjesinde, Qazaqstan quramasy Italııa, Slovenııa jáne Fınlıandııamen birge V tobynda synǵa túsetin boldy. ÝEFA reıtıngi boıynsha Qazaqstan quramasy jerebe aldynda Ispanııa, Reseı jáne Portýgalııa quramalarymen birge birinshi sebette ornalasqan bolatyn.
2022 jylǵy eń úlken jarystyń biri sanalatyn fýtzaldan Eýropa chempıonatynda bıyl alǵash ret 16 qurama (buǵan deıin 12 komanda synǵa túsken) baq synamaq. 19 qańtar men 6 aqpan aralyǵynda Amsterdam jáne Gronıngen qalalarynda 32 match oınalady. Ár top tórt komandadan turady.
Alǵash ret kári qurlyq birinshiliginiń fınaldyq kezeńin qabyldaıtyn Nıderland quramasy Eýro-2022 fınaldyq oıyndaryna tikeleı joldama aldy. Qalǵan elderdiń ishinde Portýgalııa (Eýro-2018 jeńimpazy), Ázerbaıjan, Bosnııa jáne Gersegovına, Horvatııa, Fınlıandııa, Grýzııa, Italııa, Qazaqstan, Polsha, Reseı, Slovakııa, Slovenııa, Ispanııa jáne Ýkraına bar. Serbııa men Belarýs quramalary qurlyq dodasynyń sońǵy joldamasyn 14 jáne 17 qarasha kúnderi sarapqa salady.
Quramamyz toptyq kezeńdegi alǵashqy eki matchyn Gronıngen qalasynda, al sońǵy oıynyn Amsterdamda ótkizedi. Oıyndar kestesine sáıkes Qazaqstan quramasy 20 qańtarda Slovenııa, 24 qańtarda Fınlıandııa jáne 28 qańtarda Italııa quramalarymen kezdesedi.
Jerebe tartý rásiminen keıin fýtzaldan Qazaqstan quramasynyń bas bapkeri Paýlo Rıkardo Kaka Qazaqstan fýtbol federasııasynyń baspasóz qyzmetine suhbat berip, toptaǵy qarsylastar týraly óz pikirin ortaǵa saldy.
– Meniń oıymsha, barlyq topqa myqty qarsylastar jınaldy. Eshbirin bóle-jaryp, myna qurama álsiz nemese mynaý myqty dep aıta almaımyn. О́ıtkeni chempıonatqa osal quramalar qatyspaıdy. Barlyq 16 komanda jaqsy deńgeıde. Birinshi matchty Slovenııamen ótkizemiz. Bul quramamen álem chempıonatynyń irikteý kezeńinde oınadyq. Olar tehnıka jaǵynan óte myqty. Bul kezdesýde bizge 2018 jylǵy Eýropa chempıonatynyń sońǵy matchynda «qyzyl qaǵaz» alyp, alańnan qýylǵan Dýglas kómektese almaıdy.
Fınlıandııa quramasy týraly aıtatyn bolsam, olardyń quramynda sheberlik deńgeıi joǵary oıynshylar joq. Degenmen óte jınaqy komanda. Qazir Italııa quramasynda býyn almasý kezeńi júrip jatyr. Buryn Italııa sapynda 10-ǵa jýyq brazılııalyq oınaǵan bolsa, qazir olardyń quramynda jergilikti oıynshylar kóp. Chempıonatqa daıyndyqty 3 qańtarda bastaımyz. Sondaı-aq 13 jáne 15 qańtarda eki joldastyq kezdesý ótkizýdi josparlap otyrmyz. Bizde qarsylastarmen aldyn ala kelisim bar.
– Jarty jyl ishinde eki birdeı iri týrnırde baq synaý, árıne, ońaı emes. О́te tyǵyz kúntizbemen jumys istep jatyrmyz. Alaıda biz bul faktordy óz paıdamyzǵa jaratýymyz kerek. Maqsat – qıyndyq týraly oılanbaı, parketke shyǵyp, ár oıynda jeńiske jetý, – dedi Kaka.
2018 jyly Slovenııanyń Lıýblıana qalasynda ótken Eýropa chempıonatynda Qazaqstan quramasy úshinshi oryn úshin ótken básekede Reseı fýtzalshylarynan jeńilip, tórtinshi orynǵa taban tiregen edi.