Bas shaharda Astana Mining & Metallurgy 11-shi taý-ken metallýrgııalyq kongresi óz jumysyn bastady. Bıylǵy kongress pandemııa jaǵdaıyndaǵy álemdik taý-ken ónerkásibine arnalyp, memlekettik organdar, halyqaralyq sarapshylar, iri kompanııalardyń basshylary, qyzmettik kásiporyndardyń top-menedjerleri saladaǵy ózekti máseleler men damý perspektıvalaryn talqylady.
Indýstrııa jáne ınfraqurylymdyq damý vıse-mınıstri Ádilbek Sársembaev taý-ken sektoryn Indýstrııa 4.0-ge aýystyra otyra tehnologııalyq prosesterdi jańǵyrtý jónindegi jumysty jalǵastyrý qajettigin aıtty. Sondaı-aq sıfrly transformasııa, energııany únemdeý, kómirtegi beıtaraptylyǵyn qamtamasyz etý, damýdyń shıkizattyq modelinen óńdeýge kóshý sekildi damýdyń mańyzdy aspektilerin jetkizdi.
«Memleket basshysy halyqqa arnaǵan Joldaýynda aıtqandaı, elimizdiń resýrstyq áleýeti tolyq ashylmaǵan jáne geologııalyq zertteý deńgeıi tómen deńgeıde. Bul baǵytta izdeý tehnologııasyn jaqsartyp, ınvestısııany ulǵaıtý qajet. Investorlarǵa keshendi qoldaý kórsetetin jáne geologııalyq aqparattyń ashyq sıfrly derekqoryn jasaıtyn Ulttyq geologııalyq qyzmetti qurý elimizdegi geologııalyq barlaýdy damytýda negizgi ról atqarady», dedi Á.Sársembaev.
Taý-ken óndirý jáne taý-ken metallýrgııa kásiporyndary qaýymdastyǵynyń atqarýshy dırektory Nıkolaı Radostovestiń sózine súıensek, pandemııa jaǵdaıynda taý-ken kesheni ekonomıkanyń basqa salalary sekildi óz pozısııasyn joǵaltpaı, kerisinshe nyǵaıta tústi.
Dese de bul baǵytta atqarylatyn sharýalar áli az emes. Birinshi kezekte bul ekologııamen baılanysty máseleler. Qaýymdastyq ókili kásiporyndardy ozyq qoljetimdi tehnologııalarǵa kóshirý úshin arzan nesıe berýdi, ımporttyq jabdyqty ákelýde jeńildikter jasaýdy, sol sekildi jedeldetilgen amortızasııany engizip, yntalandyrýdy usyndy.
Ekinshi másele, kómir óndirisiniń bolashaǵyna qatysty. Qaýymdastyq basshysy Memleket basshysynyń kómirtegi beıtaraptyǵyna baılanysty saıasatty qoldaıtynyn aıtyp, salany qaıta qurylymdaýdyń múmkindikterine nazar aýdartty.
«Qazaqstanda kómir qory kóp. Bul – bizdiń kemshiligimiz emes, kerisinshe artyqshylyǵymyz. Bizge kómir salasynyń ekonomıkalyq damýynyń jańa modelin quryp, transformasııalaýymyz kerek. Qazir koks hımııasy, hımııa jáne farmasevtıka ónerkásibi baǵytyndaǵy ónimderdiń jańa túrlerin jasaýǵa baılanysty qyzyqty jobalar iske asyrylýda. Jalpy alǵanda, kómirden 300-den astam ónim túrin shyǵarýǵa bolady», dedi N.Radostoves.
Osy maqsatta salalyq qaýymdastyq Úkimetpen birlesip, kómir ındýstrııasyn damytýǵa arnalǵan strategııany ázirleýdi usyndy.