Grekııanyń Salonıkı qalasynda sambodan jastar jáne jasóspirimder arasynda ótken álem chempıonatynda Qazaqstan qurama komandasynyń múshesi Aıda Toıshybekova tolaıym tabysqa qol jetkizdi.
Otyzǵa jýyq eldiń balýandary kúsh synasqan dúnıejúzilik dodada Qaraǵandynyń balýan qyzy 80 kılo salmaq dárejesinde qarsylas shaq keltirmeı, altyn medalǵa ıe boldy.
Jartylaı fınalda ol ýkraınalyq samboshyny tize búktirdi. Al altyn júlde úshin bolǵan beldesýde Reseıdiń myqty balýanyn aıqyn basymdylyqpen jeńgen.
Aıda Toıshybekova Qaraǵandydaǵy Álııa Moldaǵulova atyndaǵy olımpıadalyq rezervtiń oblystyq mamandandyrylǵan mektep-ınternat kolledjinde oqıdy. Ol bapker Qaırat Abdýllaevtyń qaramaǵynda jattyǵady.
Atalǵan álem chempıonatynda Qaraǵandy oblysynyń taǵy bir jas sportshysy Aldııar Qarǵulov 53 kılo salmaq dárejesinde qola júldeger atandy. Al jalpykomandalyq esepte Qazaqstannyń jastar qurama komandasy uldar jáne qyzdar arasynda Reseı men О́zbekstan samboshylaryn alǵa jiberip, júldeli úshinshi orynǵa taban tiredi.
Qaraǵandy oblysy