Joldama úshin jantalas

Pandemııaǵa baılanysty byl­tyrǵy resmı jarystardyń bárinen syrt qalǵan sportshylar úshin bıylǵy maýsymnyń mańyz­y óte joǵary. О́ıtkeni aınaldyrǵan 3-4 aıdyń ishinde búkil jarystarǵa qatysyp, Olım­pııa oıyndaryna joldama alyp úlgerý kerek. Sol tórt jyl­dyqtyń basty dodasyna lı­senzııa beretin básekeniń alǵash­qy kezeńin Beıjiń (Qytaı) qalasy qabyldady. Mádiǵalı Qar­sybekov basshylyq etetin Qa­zaqstan komandasy úshin Álem ký­bogynyń alǵashqy irikteý keze­ńi oıdaǵydaı aıaqtaldy dep aıtýǵa tolyq negiz bar. Sebebi Beı­jiń aıdynynda bizdiń sportshylar úsh qashyqtyq boıynsha fınalǵa shyǵyp, onyń ekeýinde júldegerler qatarynan kórindi. Atap aıtqanda, 1500 metrge jarysýda Ádil Ǵalıahmetov kúmis, 500 metr qashyqtyqta Denıs Nıkısha qola medal ıelendi.

Bul – Ádil Ǵalıahmetovtiń álemdik dodalardaǵy birinshi, so­nymen qatar 1500 metrdegi Qa­zaqstan quramasynyń da jeńip alǵan tuńǵysh medali. Iаǵnı Qa­zaqstan short-tregi úshin tarıhı medal desek te bolady. Al buǵan deıingi jarystarda jer­les­teri­miz tek 1000 jáne 500 metr qa­shyq­­tyqta ǵana el qor­jynyna júlde salyp kelgen edi.

Sonda-aq 23 jastaǵy oral­dyq sportshy úshin kúmis júl­deniń quny altynmen para-par desek te bolady. О́ıtkeni Ádil fı­naldyq saıysta kil myq­ty­­larmen synǵa túse otyryp, máre syzyǵyn ekinshi bolyp kesti. Otandasymyz fınalda Olım­­pıadanyń úsh jeńim­pazy­men saıysqa tústi. Atap aıtar bolsaq, Ádil Ǵalıahmetov estafetada 2018 jylǵy Phenchhan Olımpıadasynyń chempıondary Lıý Shaolıng pen Lıý Shaoang jáne Sochı Olımpıadasynyń je­ńimpazy Semen Elıstratovpen júldege talasty.

«Ekinshi oryn ıelengenime óte qýanyshtymyn. Bul – meniń ǵana emes, búkil komandanyń, Qa­zaqstannyń jeńisi. Munymen bo­sańsyp qalmaımyz. Alda Álem kýbogynyń úsh kezeńi bar. Sonyń qorytyndysy boıynsha Olımpıada joldamasy sarapqa salynady. Demek, tartysty ke­zeńniń bári alda», dedi Ádil jarystan soń Ulttyq Olımpıada komıtetiniń baspasóz qyzmetine bergen suhbatynda.

2017 (Almaty) jáne 2019 (Kras­noıarsk) jyldarǵy Qysqy Ýnıversıadanyń qola júldegeri, quramanyń tájirıbeli sportshysy Denıs Nıkısha bul joly da úzdikter qatarynan kórinip, qola júldege qol jetkizdi. Keıingi jyl­dary jar­qyn jeńisimen kóz­ge túse almaı júrgen otan­dasymyz úshin bul medal oǵan úlken serpi­lis ákelgeni ras. 500 metrge júgi­rýden basty eki qar­sylasy – Qy­taı jáne Kana­da sportshylary ja­rystan shet­tetilgen soń, Denıs­tiń júl­de­ger­ler qatarynda bolatyny bar­shaǵa belgili edi.

«500 metrge júgirýden qola júldeger atandym. Olımpıadaǵa joldama beretin lısenzııalyq jarysta júldeli orynnan kóriný – úlken jetistik. Bul – meniń ǵana emes, búkil komandanyń ortaq jeńisi. Kelesi jarystarda da barymyzdy salyp, óner kórsetýge tyrysamyz», dedi Denıs.

2016 jylǵy Álem kýbogynyń jeńimpazy, Ulttyq quramanyń úzdikteriniń biri Abzal Ájiǵalıev Qytaıdaǵy jarysta tek 500 metr­de baq synaǵan bolatyn. О́ki­nish­ke qaraı, ol eki ret eskertý alyp, fınaldyq básekeden tys qaldy.

«Lısenzııalyq Álem kýbogy­nyń alǵashqy kezeńin eki júl­demen qorytyndyladyq. Uzaq úzilisten keıin muzaıdynǵa oral­ǵan sportshylar úshin bul – ta­masha jetistik. Búginge deıin 1000 metr­ge jú­girýden Nurbergen Ju­ma­ǵa­zıev pen 500 metrge júgi­rý­den Abzal Ájiǵalıev Álem kýbo­gynda júlde alǵan bolatyn. Denıs Nıkıshanyń qola júl­desi de qýanyshymyzdy eseleı tústi. Bul – áli bastamasy. Alda Álem kýbogynyń úsh ke­zeńi bar. Biz qazirgi qarqy­ny­myzdy joǵaltpaı, Beıjiń Olım­pıadasyna joldama alý úshin bar kúshimizdi salamyz», deıdi Mádiǵalı Qarsybekov.

Búgin Japonııanyń Nagoıa qalasynda bastalatyn Álem kýbogynyń ekinshi kezeńi 31 qazanda óz máresine jetedi. Al úshinshi kezeńniń jarys­tary 18-21 qarasha kúnderi Ma­jarstannyń Debresen qala­syn­da, sońǵy sheshýshi kezeń 25-28 qarasha kúnderi Nıder­landtyń Dor­dreht qalasynda ótedi. Osy ja­rystardyń qory­tyn­dysynan keıin Beıjiń Olımpıadasyna joldama alǵan sport­shylar tizimi belgili bolady.