Panfılov aýdanynyń ákimi Talǵat О́mirálıev keshe Penjim aýylynda bolǵan tóbeleske qatysty túsinik berdi, dep jazady Egemen.kz.
Onyń aıtýynsha, keshe jastar arasynda túsinbeýshilik bolyp, onyń arty tártipsizdikkke ulasqan.
«Tártipsizdik eń birinshi Rozybakıev atyndaǵy mekteptegi eki balanyń arasyndaǵy janjaldan shyqty. Tóbelesten bir bala jaraqat alyp, aýrhanaǵa túsken. Bala aman-esen, búgin kirip, halin bilip shyqtym. Túnde ota jasalǵan, qazir jaǵdaıy jaqsy. Basynan jaraqat alypty, dárigerler gematomasyn alyp tastady. Sol tóbelesten keıin keshkisin jastar jınalyp, ulttyq máseleni kótergen. Qazir oblys ákiminiń tapsyrmasymen munda shtab quryldy. Oblys ákiminiń orynbasary, IID-nen adamdar keldi. Qazir keshe ne bolǵanyn anyqtap jatyr. Menińshe, bul jaǵdaıǵa jastardyń túsinbeýshiligi sebep boldy. Búgin aýyldyń azamattaryn jınap, olarmen jumys istep jatyrmyz», dedi aýdan ákimi.
Mekteptegi tóbelesten keıin keshkisin jastar jınalyp uıǵyr halqy ókilderi turatyn úıge tas laqtyrǵan. Sol kezde úlken bir kisi jaraqat alypty.
Sonymen qatar ákim áleýmettik jelide taraǵan órtengen úıdiń bul oqıǵaǵa esh qatysy joq ekenin aıtty.
«О́rtengen úı osy aýyldiki. Jastar kóshege shyqqan sátte úı órtengen. Onyń bul jaǵdaıǵa esh qatysy joq. Ol úıdiń turǵyndaryn týǵan-týystaryna ornalastyrdyq. Aldaǵy ýaqytta ol úıdiń shatyryn jabýǵa kómektesemiz. Úıdiń ıesi qazaq», dedi Talǵat О́mirálıev.
Aıta ketsek, keshe áleýmettik jelide Panfılov aýdanyndaǵy janjal jaıly vıdeolar tarady. Onda mekteptegi oqýshylar arasyndaǵy tóbeles pen túngi ýaqytta toptasqan adamdardyń belgisiz úıge tas laqtyrp jatqany jáne úılerdiń órtengeni beınelengen.