Qatań qadaǵalaý qolǵa alyndy
Elimizde teńge baǵamynyń ózgerýine baılanysty baǵanyń kúrt ósýine jol bermeý sharalary Almaty oblysynda da atqarylýda. Taldyqorǵan qalalyq ákimdigi men «Jetisý» ÁKK» UK» AQ birlesken jumys tobyn qurdy. Kelissóz barysynda alypsatarlyqpen aınalysatyn «saýdagerlerdiń» jolyn tyıyp, áleýmettik mańyzy bar azyq-túlik taýarlaryn naryqtyq baǵadan tómen deńgeıde satatyn 20-dan astam dúken sórelerine ornalastyrý jáne shaǵyn aýdandarda shaǵyn bazarlar jumysyn retteý qolǵa alyndy. «Arnaıy qurylǵan shtab birer kúnde tirkelgen derek boıynsha tıisti shara qoldanýda. Naqtylaı tússem, turmystyq tehnıka baǵasyn ózgertken eki iri dúkenge qatysty qujat tutynýshylardyń quqyǵyn qorǵaý agenttigine jóneltildi. Sondaı-aq, dári-dármek saýdalaıtyn kóterme qoımaǵa qatysty derek boıynsha jumys atqarylýda. Naryqtaǵy taýar jáne qyzmet kórsetý baǵasy qatań baqylaýǵa alyndy», dedi Taldyqorǵan qalasynyń ákimi Ermek Alpysov. Naryqtaǵy taýar baǵasynyń negizsiz kóterilýine jol bermeý úshin oblystaǵy úlkendi-kishili dúkenderdegi, janarmaı, dárihana, kóterme saýda núkteleri men qyzmet kórsetetin mekemelerdiń jumysy bılik tarapynan qatań baqylaýǵa alynǵan. Nátıjesinde el tynysh, alypqashpa sózderdi arnaıy saýda oryndaryndaǵy qalypty baǵa toqtatty. Nurbol ÁLDIBAEV, «Egemen Qazaqstan». Almaty oblysy.Saýda bar, daýryǵý joq
Teńgeniń jańa aıyrbas baǵamynyń alǵashqy kúni bazarda da, úıde de, túzde de abyrjyǵan keıip bolǵany ras edi. Adamdar dúkenderden qolyna ilikkenin satyp alyp, daýryǵyp ketken bolatyn. Sasqanda ne alyp, ne qoıǵanyn bilmegender bar. Alańdaǵan jurt aqparat quraldaryna qulaq túrdi. Elbasynyń tapsyrmasymen Úkimettiń, jergilikti atqarýshy bıliktiń osy baǵyttaǵy shuǵyl jumystarynyń arqasynda kúndelikti turmysqa birinshi qajetti azyq-túliktiń, basqa da taýarlardyń baǵasy baıaǵysha qalatyn boldy. Eń aldymen, adamdardyń kóńili ornyqty, munan qıyn kezde de kún kórgenin esine aldy, shúkirlik etti. Jergilikti atqarýshy bılik alǵashqy kúnnen bastap baǵanyn qymbattap ketpeýiniń aldyn aldy. Oblys ákimi Nuraly Sádýaqasov, onyń orynbasarlary Evgenıı Aman, Bazyl Jaqypov qalalar jáne aýdandar ákimderimen selektorlyq májilister ótkizdi. Onda kúndelikti birinshi qajetti taýarlarǵa baǵanyń qymbattamaýyn qadaǵalaýdy tapsyrdy. Onda oblys basshylyǵy un, makaron, kartop, ósimdik maıy, jarma, et pen jumyrtqa sekildi azyq-túlik túrleriniń joǵary suranysyn qamtamasyz etý úshin turaqtandyrý qorynan eptep alý kerektigin de oılastyrdy. Bul qorǵa 6,5 myń tonna azyq-túlik túrleri satyp alynǵan bolatyn. Keshe biz sholyp ótken Qostanaı qalasyndaǵy bazarlarda kúndelikti azyq-túlik baǵasy eshqandaı ózgerissiz satylýda. Alaıda, satýshylar suranystyń burynǵydan joǵary ekenin aıtty. Al satyp alýshylardy tyńdaǵanymyzda, kópshiligi «bir jınap alǵan azyq-túlik qaıda aparady, el irgesi tynysh bolsyn, ash qalatyn kún joq, kóshten qalmaspyz», dep kóńil ornyǵýyn bildirdi. Názıra JÁRIMBETOVA, «Egemen Qazaqstan». QOSTANAI.Azyq-túlik qory jetkilikti
Oblystyq ákimdiktegi jumys toptary saýda jelilerine arnaıy monıtorıng júrgizip otyrady. Bul sharýalardy oblys basshysynyń orynbasarlary qadaǵalaıdy. Qazirgi tańda aımaqta jaǵdaı turaqty. Azyq-túlik jetispeýshiligi jáne janar-jaǵarmaı men ózge taýarlarǵa baǵanyń ósýi baıqalǵan emes. Buǵan deıin iri saýda jelileri men atqarýshy bılik arasynda memorandýmǵa qol qoıylǵandyqtan osy kelisimge sáıkes negizgi azyq-túlikke on paıyzdan artyq ústeme qosylmaıdy. Baǵanyń sharyqtaýyna jol bermeý úshin turaqtandyrý qorynda azyq-túlik qory jetkilikti. Ulttyq banktiń teńgege túzetýler jasaýyna baılanysty tutyný rynogyndaǵy baǵanyń, onyń ishinde azyq-túlik baǵasynyń ósýine jol bermeýge múmkindik mol. Bul maqsatta oblysta arnaıy jasaqtalǵan turaqtandyrý qory bar. Derek kózderinen málim bolǵanyndaı, qazir turaqtandyrý qorynda 2 myń tonnanyń azyq-túlik taýarlary jatyr. Búgingi kúni qordyń qoımasynda 640 tonna kartop, 65 tonna sábiz, 130 tonna pııaz,160 tonna qyryqqabat, 12 tonna qyzylsha saqtaýly. Sonymen birge, birinshi sortty 220 tonna un, 300 tonna qant, 50 tonna kúrish pen qaraqumyq bar.
Aımaqta gazdyń baǵasy kóterilip otyrǵan joq. Elektr qýatynyń baǵasy da burynǵy kúıinde. Janar-jaǵarmaı baǵasy kóterilmeıdi. Sondaı-aq, qalyptasqan jaǵdaıǵa baılanysty aıyrbas pýnktteriniń jumystary da basty nazarda ustalýda.
Satybaldy SÁÝIRBAI, «Egemen Qazaqstan».Aqtóbe oblysy.
О́mir qýatty, tirshilik turaqty
Baǵanyń turaqtylyǵyn baqylaý úshin oblys ákimi Baqtyqoja Izmuhambetov óńir ortalyǵyndaǵy kúndelikti tutynatyn azyq-túlik túrlerin satýǵa basymdyq berilgen «Ideal», «Ataba» sýpermarketteri men «Dına», «Kóktem» saýda ortalyqtaryn aralady. Ákim saýda oryndarynyń basshylarymen, tutynýshylarmen áńgimelesti, sórelerde satylymǵa qoıylǵan ár azyq-túliktiń tusynda baǵalarynyń jazylyp turýy kerektigin eskertti. Atyraýdaǵy saýda oryndary men sýpermarketterdegi azyq-túlik baǵalary kún saıyn baqylanýda. Naqtylaı aıtqanda, beısenbide Atyraý qalasynyń ákimi Serik Aıdarbekov, al keshe oblys ákiminiń birinshi orynbasary Ǵumar Dúısembaev saýda ortalyqtary men sýpermarketterdegi baǵanyń turaqtylyǵyn tekserip shyqty. Ázirge saýda oryndaryndaǵy azyq-túlik baǵalarynda aıtarlyqtaı ózgeris baıqalmaǵan. Oblys ákiminiń baspasóz qyzmeti usynǵan málimetke qaraǵanda, tek azyq-túlik taýarlarynyń ǵana emes, sonymen birge, dárihanalar men valıýta aıyrbastaý núktelerinde, janar-jaǵarmaı beketterinde baǵa baqylaýǵa alynyp otyr. «AtyraýAgroservıs» seriktestiginiń oblystyq turaqtandyrý qorynan bosatylatyn kókónis ónimderine eń tómen baǵany belgilegenin aıtýǵa bolady. Osy seriktestik jeltoqsan aıynan beri Atyraý qalasy men aýdandarǵa qyryqqabat pen qyzylshany jáne pııazdy 70 teńgeden, sábizdi 75 teńgeden, kartopty 81 teńgeden satýdy uıymdastyrýda. Atyraý qalasynda tutynýshylar kóp tutynatyn azyq-túlik túrleri 8-9 jerdegi saýda núktelerinde arnaıy belgilengen baǵamen satylymǵa tústi. Atyraý qalasynyń ákimi S.Aıdarbekov pen eń iri saýda ortalyqtary basshylary arasynda baǵany negizsiz ósirmeý, sonymen birge, turaqtylyǵyn saqtaýdy kózdegen ortaq memorandýmǵa qol qoıyldy. О́ńir basshylyǵynyń málim etýinshe, dollar baǵamyndaǵy ózgeris azyq-túlik baǵasyna da, kommýnaldyq tólemder tarıfine de áser etpeıdi. Joldasbek ShО́PEǴUL, «Egemen Qazaqstan». Atyraý oblysy