«Elbasy medali» baǵdarlamasyna qatysýshylar jobany iske asyrý kezinde ózin ózi damytý men maqsatqa jetýdegi tabysty jannyń úlgisin kórsete bildi. Nursultan Nazarbaev qory janyndaǵy «Elbasy akademııasy» júzege asyratyn joba jastardy keshendi damytýǵa baǵyttalǵan ulttyq deńgeıdegi jalǵyz baǵdarlama sanalady.
Joba qatysýshylary 6-18 aı ishinde sport, daryn men daǵdy, kitap oqý, ulttyq mura, eriktilik, týrıstik saıahattar, eńbek tájirıbesi syndy 7 baǵyt boıynsha tapsyrmalar oryndaıdy. Jobanyń úzdik qatysýshylary joǵary oqý oryndarynda tegin oqýǵa múmkindik alady.
Jobanyń belsendi elordalyq qatysýshylary «Elbasy medaliniń» kóptegen baǵyty men qundylyǵyn kórsetetin «Bárinen myqty» motıvasııalyq beınebaıanyn daıyndady. Rolık balalardy maqsat qoıa bilýge, ózine senimdi ári belsendi bolýǵa, sportpen shuǵyldanýǵa úndeıdi. Jastar ánniń sózi men áýenin jazyp, bıin de oılap tapqan. «Qazirgi tańda tabysqa jetý men eldiń damýyna úles qosý úshin beınebaıanda kórsetken talaptarǵa sáıkes bolý kerek. Bul týyndy – eldiń bolashaǵyna negizdelgen qundylyqtardy beıneleıtin bizdiń jáne memleket jetistiginiń kórinisi. Sol sebepti, shyǵarmashylyq jumysymyzdy Qazaqstan Táýelsizdiginiń 30 jyldyǵyna arnadyq», deıdi jobaǵa qatysýshylar.
Joba bastalǵanǵa deıin qatysýshylar qola, kúmis nemese altyn deńgeıdi tańdap, 6 aıdan 18 aıǵa deıingi baǵdarlamany bastaýy kerek. Belgilengen baǵyt boıynsha tapsyrmany oryndap, qatysýshylar apta saıyn esepti saıtqa júkteıdi, al ony tálimger tekseredi.
«Elbasy medali» jobasyna eki jylda elimizdiń ár óńirinen 20 myńnan astam adam qatysty. Eki jyl ishinde Elbasynyń 4120 qola jáne 8 kúmis medali tabys etildi. Qazaqstan joǵary oqý oryndaryna bilim granttaryn taǵaıyndaý kezinde medal ıegeri artyqshylyqqa ıe bolady (UBT baly teń bolsa, Elbasy medaliniń ıesine basymdyq beriledi). Mysaly, 2021 jyly 605 medal ıesi bilim grantyn aldy, onyń 30%-dan astamy – aýyl mektebiniń túlekteri.