Qazaqkonserttiń resmı ataýy aýysty. Elimizdiń bas konserttik uıymyna KSRO jáne Qazaqstannyń halyq ártisi, Halyq qaharmany Roza Baǵlanovanyń esimi berildi, dep habarlaıdy Egemen.kz.
Qazaqkonserttiń ataýy QR Úkimetiniń 17 tamyzdaǵy qaýlysyna sáıkes aýysty.
2022 jyly qazaqtyń bulbul ánshisi Roza Baǵlanovanyń týǵanyna 100 tolýyna oraı Memleket basshysy Qasym-Jomart Toqaev uly ánshiniń esimin halyq jadynda máńgi saqtaý úshin sharalardy qabyldaýdy tapsyrǵany belgili. Uıym basshysy Jeńis Seıdýllauly málimdegendeı, Qazaqkonsert ujymy úshin bul - ózekti tapsyrma. - Qazaqkonsert tarapynan uıymǵa Roza Baǵlanovanyń esimin berý máselesin qarastyrý jóninde Mádenıet jáne sport mınıstri A.Raıymqulovanyń atyna hat joldanǵan bolatyn.
Bul ıgi bastamany halyq ártisteri, Qazaqkonsert quramynda óner kórsetip júrgen elimizdiń eńbek sińirgen qaıratkerleri, mádenıet úzdikteri men jas talanttar birden qoldady. Olardyń qatarynda: Bıbigúl Tólegenova, Nurǵalı Núsipjanov, Murat Qusaıynov, Aqjol Meıirbekov, Altynbek Qorazbaev, Roza Rymbaeva, Aıman Mýsahadjaeva, Naǵıma Esqalıeva, Maqpal Júnisova, Aıjan Nurmaǵambetova, Baǵdat Samedınova, Jeńis Ysqaqova, Qurmash Mahan, Azamat Jyltyrkózov, Erlan Rysqalı, Medet Chotabaev, Ámire t.b. oryndaýshylar bar.
Atalǵan shara Roza Baǵlanova esiminiń ult jadynda, keleshek urpaqtyń esinde máńgi saqtalýyna jáne ýaqyt ótken saıyn qaıta jańǵyryp otyrýyna eleýli úles qosady dep bilemiz, dep jetkizdi Jeńis Seıdýllauly. О́tken konserttik maýsymda óziniń 60 jyldyq mereıtoıyn atap ótken Qazaqkonserttiń tarıhyna úńilsek, Roza Baǵlanova bul uıymda 1960 jyldan bastap, ómiriniń sońyna deıin jemisti eńbek etken. Qazaqkonserttiń negizin qalaýshylardyń biri, uıymnyń ánshisi bolyp qazaqtyń án ónerin damytýǵa ólsheýsiz zor úles qosty.
Kózi tirisinde aty ańyzǵa aınalǵan Roza Tájibaıqyzy maıdan dalasynda án salyp, ásem daýsymen búkil álemdi tamsandyrdy.
Bar ǵumyryn halqyna arnaǵan Roza Baǵlanova boıyndaǵy talantymen qazaq óneriniń ulylyǵyn pash etip, elimizdiń rýhanı baılyǵyn asqaqtata tústi.