Shymkentte kóz aýrýlary bar naýqastardy qabyldaıtyn klınıka ashyldy. 1934 jyldan beri qyzmet atqaryp kele jatqan Almaty Kóz aýrýlary Qazaq ǵylymı-zertteý ınstıtýty qalamyzda klınıkasyn ashty, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
Qazaqstannyń ońtústik óńiri bólimshesi sanatyndaǵy bul klınıka ozyq medısınalyq jabdyqtarmen qamtylǵan.
Zamanaýı úlgidegi jańa medısınalyq ortalyqtyń ashylý rásimine Parlament Májilisiniń depýtattary, Densaýlyq saqtaý mınıstrliginiń ókilderi jáne Shymkent qalasynyń ákimi qatysty.
Ashylý rásiminde sóz alǵan qala basshysy Murat Áıtenov klınıkanyń ashylýy arqyly turǵyndardyń sapaly medısınalyq kómekke, bilikti dárigerlerden keńes alýǵa qoljetimdiligi artqanyn atap ótti.
«Bul klınıka Shymkent qalasymen birge Jambyl, Qyzylorda, Túrkistan oblystarynyń turǵyndaryna qyzmet kórsetedi. Kúrdeli ota jasatý úshin turǵyndar buryn Nur-Sultan, Almaty qalalaryna barsa, endi mundaı kúrdeli otalar qalamyzda jasalady.
Medısınalyq kómek sapasyn arttyrý – memlekettik saıasattyń basym baǵyty. Bıylǵy jyly qalamyzda 5 medısına ortalyǵy ashyldy. Sońǵy 2 jylda medısına uıymdarynyń materıaldyq-tehnıkalyq bazasyn jańartýǵa 12,9 mlrd. teńge baǵyttaldy. Jańarý kórsetkishi 81 paıyzǵa jetedi. Aldaǵy 5 jylda 1 myń oryndyq aýrýhana, 10 emhana, 12 dárigerlik ambýlatorııa salynady. Jyl saıyn 300 dáriger shet elderge biliktiligin arttyrýǵa jiberiledi», dedi M.Áıtenov.
Shymkent qalasynda ashylǵan klınıka tutas ońtústik óńiriniń turǵyndaryna qyzmet kórsetetin bolady. Munda kúndizgi jáne táýlik boıy stansıonarlar ashylyp, 38 tósek orny daıyndalǵan. Klınıkada konsýltatıvti-dıagnostıkalyq, lazerlik em bólimsheleri ashylǵan.
Klınıka adam organızminiń kórý qabiletimen baılanysty 15 aýrý túrleri boıynsha nozologııalyq qyzmet kórsetip, em sharalaryn júrgizedi. Joǵary medısınalyq tehnologııalardyń kómegimen 9 ota túrleri jasalyp, naýqastardyń tolyq qalpyna kelýlerine deıin dárigerlik kútimge alynady. Klınıkadaǵy alǵashqy ota búgin jasalady, oǵan dárigerler ujymy tolyq daıyn.
Ortalyqta 81 adam jumyspen qamtyldy. Onyń ishinde 21 adam tájirıbeli dárigerler bolsa, orta býyn medısına qyzmetkerleriniń sany 30 adam. Qalǵandary kómekshi personaldy quraıdy.