Ahmad Masýd jetekshilik etetin Ulttyq qarsylyq maıdany AQSh-ta óz ókildigin tirkedi, dep habarlaıdy Egemen.kz.
Bul maıdan Aýǵanstanda bılikti basyp alǵan «Talıban» radıkal qozǵalysymen kúresip júr, dep málimdedi centralasian.org.
AQSh-ta ókildik tirkelgeni jóninde 28 qazanda Ulttyq qarsylyq maıdany syrtqy baılanys bóliminiń basshysy Álı Maısam Nazarı habarlady.
Onyń aıtýynsha, AQSh-taǵy ókildik - Aýǵanstan ulttyq qarsylyq maıdanynyń sheteldegi alǵashqy mıssııasy.
«Endi UQM óz múddesin shetelde resmı túrde qorǵap, amerıkalyq saıasatkerlerdi aýǵan oppozısııasyna kómektesýge kóndirýge tyrysady», deıdi Álı Maısam Nazarı.
Qarsylyq maıdanynyń resmı ókiliniń aıtýynsha, AQSh áskerı-saıası uıymdy tirkeýge ruqsat bere bermeıdi.
Álı Maısam Nazarı eki kún buryn áleýmettik jelide UQM saıası qyzmetin de jandandyratynyn jazǵan. Jaqynda ol Aýǵanstandaǵy jaǵdaıdy Italııa parlamentiniń depýtattarymen birge talqylaǵan.
Aýǵanstan ulttyq qarsylyq maıdany, bıyl tamyzda «Talıban» Kabýldy basyp alǵannan keıin, Panjsher provınsııasynda quryldy. Radıkal qozǵalys bıligin moıyndaýdan bas tartqan kúshter Ahmad Masýd mańaıyna toptasty.
Qazir Panjsherde ne bolyp jatqany beımálim. Tálipter provınsııada uıaly baılanys pen ınternetti úzip, shatqalǵa baratyn joldardyń bárine baqylaý ornatty.
Eki apta buryn Panjsherde bir top adamdy bir qorymǵa kómgeni týraly málimet tarady. Biraq tálipter «beıbit panjsherlikterdi qyrǵan» degen aıypty joqqa shyǵardy.