Soltústik Qazaqstan oblysynda jol erejesin buzyp, jyldamdyqty asyra siltegen 8230 kólik júrgizýshisi jaýapqa tartylǵan, dep habarlaıdy Egemen.kz.
Polısııa departamentiniń baspasóz qyzmeti jyl basynan beri jyldamdyq rejımin buzýdyń kesirenen tórt adamnyń jaraqat alǵany týraly aqparat taratty.
Polısııa qyzmetkerleri jyldamdyqty arttyrýǵa qumar júrgizýshilerdi reıdter jáne jedel-profılaktıkalyq is-sharalar kezinde anyqtaǵan. Kóbinese júrgizýshiler qaladaǵy Jambyl men Ǵ. Músirepov kósheleriniń qıylysynda ruqsat etilgen jyldamdyqtan asyryp jiberedi eken. Bul aımaqtan 518 buzýshylyq anyqtaldy. Jyl basynan beri jyldamdyq ólshegishterdiń kómegimen 1431 kólikti jyldam júrgizetin azamat jaýapqa tartyldy.
«Eldi mekenderde kólik quraldarynyń tıisti jol belgilerimen belgilengen, saǵatyna 90 shaqyrymnan aspaıtyn arnaıy qozǵalys rejımderin qospaǵanda, saǵatyna 60 shaqyrymnan aspaıtyn jyldamdyqpen júrýine ruqsat etiledi. Turǵyn aýdandar men aýla aýmaqtarynda saǵatyna 20 shaqyrym jyldamdyqtan asyrýǵa bolmaıdy. Biraq muny kóbisi eskere bermeıdi» deıdi jergilikti polısııa qyzmeti basqarmasynyń bastyǵy Aıdyn Baımatov máseleniń mán-jaıyn túsindirip.