Qurlyqtyq hokkeı lıgasynda (QHL) baq synap jatqan elordanyń «Barysy» syrt aıdynda ótken ekinshi oıynynda da jeńiske jetti. Alǵash Vladıvostoktyń «Admıralyn» 4:1 esebimen jeńse, bul joly Habarovskiniń «Amýryn» 1:0 nátıjesimen qapy qaldyrdy.
QHL-dyń keıingi oıyndarynda qatarynan tórt matchta jeńilip, jankúıerlerin ókpeletip alǵan «Barys» osylaısha eńse tiktep keledi. «Platıným Arena» arenasynda ótken kezdesýdiń birinshi kezeńinde komandalar bir-biriniń qaqpasyna gol soǵa almady. Úzilisten keıin erekshe kúsh-jigermen muzaıdynǵa shyqqan Iýrıı Mıhaılıs shákirtteri 32-mınýtta esepte alǵa shyqty. «Barys» sapynan Kırıll Savıskıı mergendigimen kózge tústi. Al úshinshi kezeńde tablodaǵy esep ózgergen joq.
Osylaısha, qatarynan ekinshi oıynda jeńiske jetken «Barys» «Shyǵys» konferensııasynda 7-orynǵa kóterildi.