QR Premer-Mınıstri Asqar Mamınniń tapsyrmasy boıynsha «Aýyl – El besigi» jobasynyń iske asyrylý barysymen tanysý úshin QR Ekologııa, geologııa jáne tabıǵı resýrstar mınıstri Serikqalı Brekeshev Batys Qazaqstan oblysyna bardy, dep jazady Egemen.kz.
Sapar barysynda Mınıstr oblystaǵy «Aýyl – el besigi» baǵdarlamasy boıynsha jóndelgen jáne salynyp jatqan obektilermen tanysty.
Serikqalı Brekeshev Mahambet aýylynda klýb ǵımaratynda bolyp, Jympıty aýylyndaǵy avtomobıl jolynyń qurylysyn baqylady.
100 oryndyq aýyldyq klýb nysanynyń qurylys jumystary 100% paıyzǵa oryndaldy. Oǵan respýblıkalyq bıýdjetten 81,9 mln teńge qarajat bólingen. Al Syrym aýdany Jympıty aýylyndaǵy joldardyń qurylys jumystary 90-95 paıyzǵa oryndalǵan. Onda respýblıkalyq bıýdjetten 148,1 mln teńge qarajat bólindi. Joldyń uzyndyǵy 1,5 shaqyrymdy quraıdy.
Sondaı-aq, mınıstr Kırov-Shejin magıstraldy kanalyn Oral-Kóshim júıesinen «Úlken О́zenge» basseınaralyq sý jiberý úshin rekonstrýksııalaý jobasynyń qurylys barysyn tekserdi.
Obektige 7 birlik tehnıka jáne 10 adamnan turatyn jumys brıgadasy jumyldyrylǵan. Sý qabyldaǵysh boıynsha daıyndyq jumystary 80%-ǵa, bógettiń eńisin bekitý boıynsha 80%-ǵa, paıdalaný jolymen biriktirilgen bógetti jóndeý boıynsha jáne kıývetti toltyrý boıynsha 35%-ǵa daıyndyq jumystary júrgizildi.
«Aýyl – El besigi» jobasyn iske asyrý qorytyndylary boıynsha keńeste mınıstr Batys Qazaqstan oblysyndaǵy jobanyń qarqyny týraly málimdedi.
«Árıne, joba aıasynda óńirde kóp jumys atqarylyp jatyr. Baǵdarlamada 24 perspektıvaly aýyl qamtylyp, birqatar áleýmettik sala nysandary jóndeldi. Ondaǵan shaqyrym jol, elektr berý jelileri qaıta jańartyldy. Sonymen qatar, barlyq nysandar belgilengen merzimde tapsyrylǵanyna nazar aýdarý qajet. Bul rette sapa máselesi erekshe baqylaýda bolýy tıis. Sondaı-aq shekaralas aýyldardyń strategııalyq mańyzdylyǵyn eskere otyryp, baǵdarlamaǵa qosý máselesi de ózekti bolyp tabylady», dedi mınıstr.
Jalpy, 3 jyl ishinde óńirde 107,2 km astam jol salyndy, qaıta jańartyldy jáne jóndeldi. 7,1 km sý qubyry jelisine, 11 mektepke, 10 mádenıet jáne sport obektisine kúrdeli jóndeý júrgizildi. Kóshelerdi jaryqtandyrý úshin 6,1 km elektr berý jelisi salyndy.
Aıta keteıik, «Aýyl – El besigi» jobasy 2019 jyldan beri Elbasy Nursultan Ábishuly Nazarbaevtyń bastamasymen júzege asyrylyp keledi. Jobanyń maqsaty – aýyldardaǵy ómir súrý sapasyn jaqsartý, aýyldyq aýmaqtardyń áleýmettik jáne ınjenerlik ınfraqurylymyn jańǵyrtý, ony jańa óńirlik standarttarǵa saı etý bolyp tabylady.