Elordadaǵy «Han Shatyr» SOO-daǵy azamattardy KVI-ǵa qarsy vaksınalaýǵa arnalǵan egý pýnkti jabylady. Qalalyq Qoǵamdyq densaýlyq saqtaý basqarmasynyń habarlaýynsha, olar vaksınalaý boıynsha óz qyzmetin osy jyldyń 1 qarashasynan bastap aıaqtaıdy.
«Jazda adamdardyń kóptep kelýi kezeńinde egý pýnktterin qalanyń 11 saýda keshenine ornalastyrdyq. Bul oń nátıje berdi jáne biz vaksınamen halyqty barynsha qamtydyq. Qazirgi ýaqytta biz vaksınalaýǵa jatatyn kontıngentten halyqtyń basym bóligin qamtyǵandyqtan, saýda keshenderi bazasynda egý pýnktterin uıymdastyrýdyń asa qajettiligi joq. Biraq mundaı qajettilik paıda bolǵan kezde biz árqashan pýnktterdi qaıtadan ashýǵa daıynbyz», dedi qalalyq Densaýlyq saqtaý basqarmasy ókilderi.
Elordada barlyq kezeńde SOO, saýda úıleri janyndaǵy vaksınalaý aımaqtarynda 100 myńnan asa adam vaksına aldy. Búgingi tańda qaladaǵy 5 saýda núktesinde egý pýnktteri bar. Olar – «Han Shatyr» SOO, «Kerýen», «Abý Dabı Plaza», «Azııa Park» jáne «Evrazııa» saýda úıi.
Jalpy qala boıynsha búginde vaksınanyń birinshi komponentin 444 myńnan asa azamat aldy, 410 myńnan asa adam tolyq ımmýndaýdan ótti.
Basqarma jalpyǵa ortaq iste óziniń azamattyq ustanymyn tanytqan jáne óz aýmaqtarynda vaksınalaý aımaqtaryn ashqan barlyq saýda keshenderine úlken alǵys bildiredi.
Densaýlyq saqtaý mınıstrliginiń málimetine súıensek, 1 qarashadaǵy málimet boıynsha Qazaqstanda birinshi komponentpen 8 300 105 adam, ekinshi komponentpen 7 500 328 adam vaksına saldyrdy. Sonymen qatar 46 492 adam koronavırýs ınfeksııasynan emdelýde, olardyń ishinde 8 412 pasıent stasıonarda, 38 080 naýqas ambýlatorlyq deńgeıde em qabyldaýda. Al 590 adamnyń jaǵdaıy aýyr, 149 pasıenttiń jaǵdaıy óte aýyr, 94 naýqas О́JJ apparatynda jatyr.