Serbııa astanasy Belgrad qalasynda ótip jatqan bokstan álem chempıonaty kún ótken saıyn qyzyp keledi, dep habarlaıdy Egemen.kz.
Búgin Qazaqstan ulttyq quramasynyń 10 birdeı boksshysy álem chempıonatynyń kem degende qola júldegeri atanýǵa tyrysady. Saǵat 18:00-de bastalatyn kúndizgi sessııada aldymen 48 kılo salmaqtaǵy tájirıbeli tarlanymyz Temirtas Júsipov rıngke kóteriledi. Ol ózbek Nodırjon Mırzahmedovtyń mysyn basýǵa kúsh salady. Budan soń 54 kılo salmaqtaǵy Mahmud Sabyrhan brazılııalyq Maıkl Trınıdadpen judyryqtassa, 60 kılo salmaqtaǵy Samatáli Tóltaev fransýz Sofıan Ýmıamen qolǵap túıistiredi. Keıinnen ulttyq quramanyń kapıtany Abylaıhan Júsipov mońǵolııalyq Chınzorıg Baatarsýhtyń shamasyn baıqap kóredi. Al 75 kılo salmaqtaǵy Nurqanat Raıys ıtalııalyq Salvator Kavallaroǵa qarsy baryn salmaq.
Budan soń keshki sessııa bastalady. Keshki sessııada aldymen Olımpıada oıyndarynyń qola júldegeri, 51 kılo salmaqtaǵy sańlaǵymyz Sáken Bıbosynov rıngke shyǵady. Álem chempıonatynyń jartylaı fınalyna shyǵý úshin ol kolýmbııalyq Iýberhen Martınespen judyryqtasady. Munan soń 57 kılo salmaqtaǵy Serik Temirjanov reseılik Edýard Savvınmen, 63,5 kılo salmaqtaǵy Sanatáli Tóltaev shotlandııalyq Rız Lınchpen, 71 kılo salmaqtaǵy Aslanbek Shymbergenov ýkraınalyq Iýrıı Zahareevpen, 80 kılo salmaqtaǵy Nurbek Oralbaı serb Vladımır Mıronchıkovpen judyryqtasady.