Qazaqstandaǵy akademııalyq reıtıngter sapa standarttaryna saı kelmeıdi. Akademııalyq adaldyq lıgasynyń platformasynda bilim salasynyń sarapshylary elimizdiń joǵary oqý oryndaryna jasalatyn reıtıngterdi talqylaý barysynda osyndaı málimdeme jasady. Mundaı reıtıngter joǵary oqý oryndarynyń jaqsarýyna kómektesýdiń ornyna, kerisinshe, sapasyz reıtıngteri arqyly olardyń bedelin tómendetedi. Sarapshylar sonymen birge Bilim jáne ǵylym mınıstrliginiń qyzmeti men joǵary jáne joǵary oqý ornynan keıingi bilim berý salasynda atqarylyp jatqan jumystarǵa nuqsan keltiretinin alǵa tartady.
«Osy oraıda «Qazaqstan stýdentter alıansy» ótkizetin reıtıngke erekshe toqtalyp ótýge bolady. Bul reıtıng bilim alýshylardyń saýaldamasynyń negizinde jasalyp, áleýmettik jelilerde belsendi túrde jarnamalanyp júr. Atalǵan reıtıngti daıyndaýshylar ekinshi jyl qatarynan Qazaqstannyń úzdik jáne sapasy tómen joǵary oqý oryndary boıynsha tizimdi jarııalaıdy. Olardyń 2020 jylǵy reıtınginde kórsetilgen birde-bir úzdik ýnıversıtet osy jylǵy úzdik joǵary oqý oryndarynyń qataryna kirmegeni, al ótken jylǵy eń nashar 10 ýnıversıtettiń qatarynda bolǵan Narhoz ýnıversıteti bıyl úzdik JOO-lar qataryna kirgeni este qalarlyq jaıt. Eger úzdikter tizimi jyl saıyn ózgerip otyrsa jáne oǵan akademııalyq jetistikteri týraly eshkim estimegen ýnıversıtetter kire alatyn bolsa, qazaqstandyq akademııalyq reıtıngter týraly qandaı jaqsy pikir bolýy múmkin? Sonymen qatar Qazaqstan stýdentteri alıansynyń reıtıngi memleket qarjysyna jasalady. Saýaldama júrgizilgen jobaǵa Azamattyq bastamalardy qoldaý ortalyǵy 20 mln teńgege jýyq qarajat bólingen», dep atap ótti Akademııalyq adaldyq lıgasynyń sarapshysy Iаkov Voronkov.
Al «Atameken» UKP basqarma múshesi Oljas Ordabaevtyń aıtýynsha, nátıjede kórsetilgen mundaı úlken aıyrmashylyq reıtıng ádistemesinde aıtarlyqtaı kemshilikterdiń bar ekenin ańǵartady.
«Ádette, nátıjelerdiń sonshalyqty ártúrli bolýy reıtıng ádistemesiniń ózgergenin kórsetedi. Iаǵnı aqparattar ózgerdi jáne túzetildi. Bul – ázirleýshiler áli de durys ádistemeni izdep júr degendi bildiredi. Sebebi eger ádisteme qalyptasqan bolsa, ol aıtarlyqtaı ózgermeıdi, óıtkeni ózgertýdiń óziniń belgili bir negizdemesi bar. Muny tek osylaı obektıvti turǵyda túsindirýge bolady», dedi ol óz sózinde.
Is-shara barysynda Akademııalyq adaldyq lıgasynyń ókili Iаkov Voronkov joǵary oqý oryndarynyń kez kelgen akademııalyq reıtıngisiniń bes negizgi maqsatynyń bolýy kerek ekenin atap ótti. Iаǵnı talapkerlerdi jáne ózge de múddeli tulǵalardy (jumys berýshiler, ortalyq memlekettik organdar jáne t.b.) habardar etý, joǵary oqý oryndaryna uıymnyń jumysyn jaqsartýǵa múmkindik beretin derekterdi usyný, zertteýshilerge derekterdi usyný, joǵary oqý orny qyzmetin ádistemede belgilengen parametrler boıynsha keshendi baǵalaý jáne azamattyq qoǵam aldyndaǵy esep.
Onyń aıtýynsha, qazirgi ýaqytta bilim berý baǵdarlamalarynyń bir ǵana reıtıngi joǵaryda kórsetilgen maqsattarǵa jaýap beredi. Bul – jyl saıyn «Atameken» Ulttyq kásipkerler palatasy jasaıtyn reıtıng. Olar árbir joǵary oqý ornynyń qyzmetin «mansaptyq perspektıvalar», «bilim berý baǵdarlamasynyń sapasy» jáne «bilim alýshylardyń jetistikteri» sııaqty ádistemede jazylǵan parametrler boıynsha baǵalaıdy. Belgilengen ındıkatorlar boıynsha negizgi kórsetkishter resmı saıtta ashyq jarııalanady. Al ádisteme jyl saıyn joǵary oqý oryndarynyń, Akademııalyq adaldyq lıgasynyń jáne basqa da steıkholderlerdiń qatysýymen qaıta qaralyp, jaqsaryp otyrady.