Qurmanǵazy aýdanynyń Kóptoǵaı aýylynda turatyn Márııam Ishanǵalıeva 3-synypta oqıdy. Bıylǵy shildede «Álemdik model – 2021» halyqaralyq baıqaýyna sýretterin joldaǵan eken. Al qyrkúıekte baıqaý qorytyndysymen birinshi orynǵa ıe bolyp, aqtyq saıysqa joldama alǵan. Jaqynda sheshýshi saıys Sochıde qorytyndylandy.
Bıyl «Álemdik model» baıqaýyna álemniń 40 elinen úmitkerler qatysýy tıis edi. Biraq koronavırýs pandemııasyna baılanysty 25 úmitker baq synady. Qazylar alqasynyń jeti múshesi Márııamdy 6-9 jastaǵy qatysýshylardyń arasynan jeńimpaz dep tanydy. Osylaısha, atyraýlyq oqýshy baıqaýdyń bas júldesin ıelenip, «Álem juldyzy» atandy. Oǵan «Jer sharynyń sýpermodeli – 2021» atalymy qosa berildi.
̶ Qyzym jolǵa shyǵarda «Men basyma táj kıip kelemin» degende, tańǵalǵan edim. Saıys kezinde az-kem qobaljyǵany baıqaldy. О́ıtkeni halyqaralyq saıysta elimizdiń atynan jalǵyz ózi qatysty. Biz Qurmanǵazy aýdanynda turamyz. Sol sebepten, sahnaǵa Qurmanǵazynyń «Adaı» kúıimen shyqty. Tájdi basyna kıgizgen sátte qýanyshtan jylap jiberdi, – deıdi anasy Araı Qarabalaeva.
Segiz jasynda álemdik sýper model atanǵan Márııam Ishanǵalıeva bos ýaqytynda bı úıirmesine qatysady. Oǵan qosa oblystyq, respýblıkalyq baıqaýlardyń jeńimpazy atanǵan. Armany – Ońtústik Koreıada joǵary bilim alyp, dáriger bolý.