Elordanyń «Nurly jol» vokzaly mańynda kópir salynady. Bul týraly Nur-Sultan qalasynyń Kólik jáne jol-kólik ınfraqurylymyn damytý basqarmasynyń basshysy Jansultan Saparbaev málimdedi, dep habarlaıdy Egemen.kz.
Jańa kópirdiń qurylysy týraly elordanyń qalalyq máslıhat janyndaǵy qoǵamdyq keńes otyrysynda aıtyldy.
«Bizge qala turǵyndarynan kóp suraqtar kelip jatady. Sonyń biri elordada kólik keptilisin azaıtyp, sol jaǵalaý men oń jaǵalaý arasyndaǵy kólik aǵynyn retteý úshin eki kópir salynýy tıis edi. Biri Táýelsizdik dańǵylynyń boıynda, ekinshi jańa vokzal jaqta. Búginde sol kópirlerdi salý jaǵy qalaı bolyp jatyr?», dep suraq qoıdy qoǵamdyq keńes múshesi Erjan Baǵdatov.
Bul suraqqa Nur-Sultan qalasynyń Kólik jáne jol-kólik ınfraqurylymyn damytý basqarmasynyń basshysy Jansultan Saparbaev jaýap berdi.
«Táýelsizdik dańǵylyndaǵy kópir boıynsha jobalyq-smetalyq qujaty bekitilip, merdiger kompanııa anyqtaldy. Búginde bıýdjetti naqtylaý boıynsha ótinish jiberildi. Respýblıkalyq bıýdjetten kelesi jylǵa kópir qurylysyna 10 mlrd teńge suradyq. Ázirge jaýabyn kútip otyrmyz. Jobanyń jalpy quny 16 mlrd-qa jýyq teńgeni quraıdy. Ekinshi kópir «Nurly jol» vokzaly mańyndaǵy Uly dala dańǵyly boıynda boı kótermek. Biz ol kópirdi salýǵa qatysty jýyrda ekinshi ret baıqaý jarııaladyq. Sebebi birinshi ret jarııalaǵanymyzda kópir salýǵa eshkim nıet tanytpady. Qazir merdiger kompanııany taýyp, kelesi jyly qala kúni qarsańynda kópir qurylysyn aıaqtaımyz dep josparlap otyrmyz», dep jaýap berdi Jansultan Saparbaev.