Digital Bridge – bul Qazaqstannyń jáne shet memleketterdiń IT kompanııalary bas qosyp, tyń jobalardy iske asyrýdyń joldaryn pysyqtaıtyn alań. Aıtalyq, bıyl otandyq startapshylar Kremnıı alqabyndaǵy kóshbasshylardyń biri Plug and Play jahandyq ınnovasııalyq startap-platformasynyń akselerasııasynan ótýge múmkindik aldy.
Jastarǵa berilgen úlken múmkindik
Atap aıtqanda, Astana Hub, «Transtelekom» AQ jáne Plug and Play IT ekojúıeni damytý, ınvestısııa tartý, akselerasııa baǵdarlamalaryn quryp iske asyrý, sondaı-aq daryndy jastardy oqytyp, qarym-qatynasty nyǵaıtýǵa nıetti.
«Búgingi qoǵam ekonomıkalyq damýdyń faktory retinde startap ekojúıesin damytýdyń mańyzdylyǵyn moıyndaıdy. Kompanııalarymyz ben qoǵamdastyqtyń múddesi úshin uzaq merzimdi jáne tıimdi yntymaqtastyqtyń qajet ekenine senimdimiz. Bul Qazaqstandaǵy startap ekojúıesin damytýǵa septigin tıgizedi degen úmittemiz», dedi Plug and Play kompanııasynyń ókili Sanjar Taromı.
Osy yntymaqtastyq arqyly Astana Hub jáne «Transtelekom» AQ Plug and Play kompanııasynyń elimizdegi ókildiginiń qoldaýymen korporatıvtik akseleratordy iske qosýǵa múmkindik aldy. Osylaısha, 20 IT startapshy Kremnıı alqabynyń sarapshylarynan tálim alyp, ınvestısııa tartýǵa, sondaı-aq iri korporasııamen qanatqaqty jobany iske qosý arqyly Playbook Plug and Play platformasynda ornalasýyna jol ashylady. Bul akseleratorǵa álemniń ózge elderinen IT komandalar qatysatynyn eskersek, qazaqstandyq kompanııalarǵa olarmen de ózara jumys isteýge týra keledi.
«Kez kelgen startaptyń negizgi maqsattarynyń biri – naryqta qalyp, ónimge degen suranysty arttyrý. О́zgelerdiń kóleńkesinde qalmaı Google, PayPal nemese Dropbox sııaqty ańyzǵa aınalýdyń joly qandaı? Bul suraqqa osy kompanııalardyń sátti shyǵýyna yqpal etken Plug and Play-dan basqa eshkim jaýap bere almaıdy. Sıfrlyq damý, ınnovasııalar jáne aeroǵarysh ónerkásibi mınıstrliginiń qoldaýymen «Transtelekom» AQ jáne Plug and Play Kazakhstan-nyń yntymaqtastyǵy arqyly jas IT kompanııalardyń áleýetin arttyrýdy jalǵastyramyz», dedi Astana Hub-tyń bas dırektory Maǵjan Mádıev.
Sóz oraıy kelgende aıta keteıik, Plug and Play Tech Center – shtab-páteri Kremnıı alqabynda ornalasqan álemdegi eń iri akselerator jáne ınvestor. Olardyń platformasy 40 myńnan artyq startapty, 500-den asa álemdegi jetekshi korporasııany, onyń ishinde ýnıversıtetter men memlekettik mekemelerdi, sol sekildi 300-den astam venchýrlyq qordy, biriktiredi. Jyl saıyn Plug and Play álem boıynsha startaptarǵa 25 myń dollardan 500 myń dollarǵa deıin ınvestısııa bóledi.
Elektrondy úkimet reıtınginde úzdikter qatarynda
Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń aıtýynsha, elimizdiń elektrondy úkimetti damytýda jáne sıfrly qyzmetterdi usynýda aıtarlyqtaı nátıjeleri bar. Áıtse de bul baǵytta atqarylýy tıis sharýa áli shash etekten, dedi vedomstvo basshysy.
«Elimizdegi IT-ındýstrııa men sıfrlandyrý jumysy memleket pen IT-qoǵamdastyqtyń qarqyndy baılanysy esebinen jolǵa qoıyldy. Búginde halyqaralyq reıtıngterde jetken jetistigimiz az emes. Mysaly, BUU-nyń Elektrondy úkimetti damytýǵa baılanysty kórsetkishinde 9-orynda kelemiz. Osy reıtıngtiń qosalqy reıtınginde «Onlaın qyzmetter» sýbındeksi jaǵynan álemde 11-satyda turmyz. Biraq osymen toqtap qalýǵa bolmaıtynyn jaqsy túsinemiz.
Taıaýda Prezıdentke avtotirkeýden 5 mınýt ishinde ótýge bolatynyn kórsetken edik. Meniń oıymsha, álemdegi keıbir memleketterde mundaı qyzmet áli kúnge deıin joq. Nege deseńiz, bank qosymshasynan shyqpaı-aq satýshy men satyp alýshy 4-5 túımeni basý arqyly kólikti qaıta rásimdep, satý mámilesin jasaı alady. Bul aıtarlyqtaı kórsetkish. Byltyrǵy qyrkúıek aıymen salystyrǵanda bıyl satyp alýshylardyń 35%-dan astamy avtokólikti satyp alý rásimin onlaın-formatta iske asyrdy. Demek bul klıentke baǵdarlanǵan halyqtyq qyzmet túrin jasaı alǵanymyzdy ańǵartady. Osy jumysty adamdardyń atalǵan qyzmetti sanaly túrde tańdaıtyndaı etip atqardyq», dedi B.Mýsın.
IT qyzmetiniń eksporty ulǵaıýda
Astana Hub-tyń bas dırektory Maǵjan Mádıev aıtqandaı, búginde atalǵan tehnoparkte 558 IT kompanııa tirkelgen. Olardyń 3 jyl ishindegi jıyntyq kirisi 166 mlrd teńgeni qurady. Jyl sońyna deıin tehnopark qatysýshylarynyń eksportyn 50 mlrd teńgege deıin jetkizý josparlanǵan. Dese de bul parktiń qatysýshysyna aınalý ońaı emes, deıdi M.Mádıev.
«Birinshiden, kompanııanyń qyzmeti IT naryǵyna baǵyttalǵan bolýy tıis. Demek tabysynyń 100%-y osy saladan túsýi qajet. Ekinshiden, kompanııanyń fılıaldyq jelisi bolmaýy kerek. Iаǵnı iri fırma emes, startap bolǵany abzal. Úshinshiden, tehnoparktiń qatysýshysy kirisiniń 1%-yn Astana Hub-tyń paıdasyna salýǵa mindetteledi. Bul qarajatty ekojúıeniń damýyna jumsap, qaıta ınvestısııalaýǵa jiberiledi», dedi Astana Hub-tyń bas dırektory.
Qazir Seed Money baǵdarlamasy aıasynda tehnopark 35 startapty iriktep, olarǵa 5-20 mln teńgege deıingi kólemde qarjylyq kómek kórsetiletin bolady.
Digital Bridge forýmynda Astana Hub uıymdastyrǵan baıqaýda top jarǵandar anyqtaldy. Máselen, Parqour, Kids Security, SipSim, FlowSell.me jáne Oqylyq.kz startaptaryna bıznesti damytýǵa 20 mln teńgeden berildi.