El azamaty, ult qaıratkeri

Alpys jyldyǵynda teatrdaǵy saltanatty keshte sóılegen sózimdi «Kóńil tórindegi tulǵalar» degen kitabyma shyǵarǵanmyn. «Bizdiń býynnyń lıderi» dep ataǵan edim. Áıtse de, toı ústindegi quttyqtaý sóziń bir basqa da, gazetke arnaıy jazǵan maqalań bir basqa, árıne. Onyń ústine ol dosyń seniń otbasy, oshaq qasyńda kúnde qaljyńdasyp, ázildesip júretin qurdasyń ǵana emes, el azamaty, ult qaıratkeri bıigine kóterilgen jan bolsa. Qara orman qalyń eliniń betinde, jeldiń ótinde júrgen ataıman qazaq bolsa... Dál osy joly úndemeı qalýdyń eshqandaı qısynyn taba almaǵam... Qysqasy, jasymyzda júrek tabystyryp, keıingi uzaq jolda tilek qostyrǵan zııatker dosymyzdyń mereıli jasy tusynda biletinimizdiń birazyn aqtarýǵa bel býdyq. «Ol kisi týraly maqala berdik qoı» dep tarylmaı, gazetti úlken bıikke kóterip, redaksııaǵa segiz qabat ǵımarat saldyryp, eki kóppáterli úı, eki jataqhana qaldyryp, barsha qyzmetkerdi túgel bas­panaly etip ketken azamatqa qaıta-qaıta qurmetin kórsetip jatqan «Egemenniń» iriligine de razymyz. Onyń ústine «Egemen Qazaqstany» Saýytbektiń suhbattarynan bir kitap qurastyryp, toıyna tartý etedi eken degendi estip taǵy qýanǵanbyz.

Shúkir deıik, kórip te, estip te, bilip te jatyrmyz, Erdiń synshysy Eli eken. Saýytbek Abdrahmanovtyń jetpis jas­tyń mereıtoıyna oraı baspasóz betterinde ilgerindi-keıindi maqalalar jazylyp, úlkendi-kishili materıaldar shyǵyp jatyr. Bári de jón, bári de reti­men. Jurttyń aýzy – ýáli. Eli úshin taban et, mańdaı terin tógip, adalynan eńbek etip júrgen atpal azamattar týraly qansha jazsa da kóptik etpeıdi. Halqymyzda qa­syndaǵy asylyn tanı bermeıtin, baǵalaı bilmeıtin nemquraı minezi ejelden baryn da bilemiz. Sony ańǵarǵan atam qazaq «Qolda barda altynnyń qadiri joq» dep tegin aıtqan ba? Bul joly eli men jur­ty juldyzy kókte jarqyraı janǵan Azamatyn shyn tanyp jatqandaı, as ta tók baǵasyn aqtarylyp, molynan berip jatqandaı. Onyń eshqandaı da oǵashtyǵy joq. Biraq tereńge boılaý úshin óziń de osal bolmaýyń kerek, sol dárejege jýyq oısań óris, paıymdy parasat kerek. Sondyqtan Aq Ertistiń ózi bolmasaq ta, bulaǵy bolǵanymyzǵa, aqyldy bastyń ózi bolmasaq ta, qulaǵy bolǵanymyzǵa táýbe etemiz. Sonyń ózinde de keıipkerimizdiń oı tereńine súńgı almaı, tylsymyna jete almaı jatamyz.

«Tereńi» demekshi, osy sóz maǵan anaý bir jylǵy ózim kýá bolǵan bir jaǵdaıdy eske túsirgen.

* * *

Altaıdyń asý bermes bıiginde tórt-bes jigit bop jazdyń jaımashýaq bir kúnderinde boı jazyp demalǵanymyz bar. Áldebir dóńgelengen aıdyn kóldiń jaǵasyna shekarashylar qaraǵaıdan qıyp bir bólmeli jolamaı baspana salyp tas­tapty.

– Mynaý bir ǵajaıyp kól! – dedi bizdi bastap ákelgen Eren Jumaǵulov dosymyz irgedegi dóńgelengen aýmaqty kóldi nusqap.

– Iá, bunyń nesi ǵajaıyp bola qapty?

– Bul kóldiń túbi joq.

– О́ıdóıt degen. Túbi joq kól bolýshy ma edi?

– Senbeseńizder, ózderińiz arqan salyp, ólshep kórińizder.

Jalpy, «ǵajaıyp» degen sózdiń bir sıqyry bar ǵoı. Únemi bir qýatty energetıka esip turady. Adamnyń delebesin qozdyryp, qyzyǵýshylyǵyn arttyrady, tylsymyna jeteleıdi.

Mundaı tosyn sózdi estigen jigitter bilekterin sybanyp jiberip, dereý iske kirisip ketken. О́zderimen ala kelgen arqannyń birin ólshep kórip edi, uzyndyǵy 25 metr shyqty. Osy da jeter dep rezeńke qaıyqty úrlep, kól tereńin ólsheýge da­ıyndalyp jatqan jigitterdi taǵy da Eren toqtatty.

– Anaý arqandaryń dym da bolmaıdy. Mende 35 metrlik qaıys arqan bar, sony ana arqanǵa qosa jalǵańdar.

Mássaǵan, ne deıdi! Bul sóz jigitterdiń áýesqoılyǵyn odan beter órshelendire túskendeı bolǵan.

Jigitter kóldiń ortasyna jete be­re shubatyp arqandy kólge tastady. Baıqaımyz, shym-shymdap kólge batyr­ǵan arqandary bitken sııaqty. Biraq qaıyq­taǵylar áli únsiz. Qaıyqtyń er­neýinen qaıta-qaıta tómenge úńile beredi.

– Áı, qaıtyńdar! Bul túpsiz kól deýshi edi, sol sóz ras bolǵany ǵoı! – dep Eren de qaırany taýsylyp, basyn shaıqady.

Qaıyqtaǵy jigitter eskekterin shalpyldatyp keri qaıtty.

Bizdiń kóz sýyrǵan qap-qara tuńǵıyq kólimiz budan myńdaǵan jyl burynǵy janartaýdyń krateri eken. О́ıtkeni kóldi jartylaı sheńber jasap kúrgeılegen qalyń qorym sony aıǵaqtaǵan.

– Alystan qaraǵanda myna kól jaı­daqtaý kóringenimen, túpsiz tereń eken! – dedi qaıyqtan túsip jatqan eger jigittiń biri.

– Men bul kóldi ózimizdiń Saýytbek aǵamyzǵa uqsatam! – dedi bylaıǵy tepseń­niń ústinde myqynyn taıanǵan Janarbek Áshimjan inimiz.

Bárimiz burylyp, jańa kórgendeı Janarbekke qaradyq.

– Prıchem zdes kól ı Saýytbek aǵa? – dedi orysshalaý ósken polıgrafıst Ahmetqalı О́teǵalıev dosymyz.

– Meniki sózdiń lámi, assosıasııa ǵoı... Kóldiń tereńdigi maǵan Saýytbek aǵa­myzdyń oıynyń tereńdigin elestetip ketti.

Bárimiz bir sát únsiz qaldyq.

– Endeshe kólge at bereıik. Bul kóldi Saýytbek kól ataıyq! Qarsylyq joq pa?

Biraýyzdan maquldandy.

* * *

О́z basym Saýytbek jaıynda oılaǵan saıyn el táýelsizdiginiń eleń-alańyndaǵy mazasyz kúnder esime túse beredi....

Apyrm-aı, dep oılaımyn qazir, biz sondaı dúrlikpeli kúnderdi, almaǵaıyp aılar men alańy kóp jyldardy bastan ótkergenimiz ras pa? Tipti keıde soǵan sengiń kelmeıdi. Ondaıda jaǵańdy ustap, óz-ózińnen qaradaı qaıran qalasyń... Jas memleketimizdiń shańyraǵyn birge kóterisip, keregesin birge kerisken, elimizdiń ishki saıasatyn túıindegen topqa sol jyldary biz de qosylǵanbyz. «О́ner» baspasynda dyńdaı bastyq – bas redaktor bolyp júrgen jerimnen «Osynda kel. Tarıh jasalyp jatyr. Uly sharýaǵa aralasý shansy bar. Apparat mektebi degen úlken mektep. Shyńdalasyń. Quryǵanda bir baspaǵa dırektor kúıinde qaıtaryńa men kepildik beremin» dep shaqyrtqan da osy Saýytbek. Baspaǵa dırektor bolý turmaq, mınıstrdiń birinshi orynbasary deńgeıine deıin jettik.

* * *

Saýytbek dosymyz bıpaz basyp, be­les­ten beleske kóterilgen eliniń abadandaı azamatynyń biri.

Ol óziniń ár belesine shyqqan saıyn, ár asýynan asqan saıyn, ár bıigin alǵan saıyn jańasha kósilip, jańa qyrynan ashylyp salýda. Stýdent keziniń ózinde attarynan at úrketin, tek odaqtyq qana emes, álemdik dárejedegi mádenıet alpaýyttarymen suhbattasty. Aqylǵa ki­shi­lik júrmeıdi deıtini ras eken. Álgi metrler sol kezdiń ózinde Saýytbekti «stýdent ekensiń» dep qomsynǵan joq, ózderimen teń dárejedegi áriptesindeı sóılesip, pikir alysty, suhbat berip, jan syrlaryn ashyp jatty. Ýnıversıtet bitiretin jyly shoń Shyńǵyspen – ataq­ty Aıtmatovpen áńgimelesýge júregi daýalaǵan dosymyzdyń sol suhbaty gazetke shyqqannan keıin eki kún ótkende ol birden «Sosıalıstik Qazaqstanǵa» qyzmetke qabyldanǵan.

Saýytbektiń keıingi úlken belesiniń biri Pýshkınniń ulylyǵyn qazaqqa qaıyra túsindirýi boldy. «Bizdiń Pýshkın» de­gen kitap shyǵardy. Doktorlyq dıs­sertasııasynyń arqaýynda jazylǵan «Tóltýma men teltýmada» aýdarma óne­riniń qyr-syryn búgingi zamana turǵysynan, jahandyq qyrynan tu­jyrymdady. Ádebıetimizdiń bul ómirsheń janryna sony óris salyp berdi. Sodan keıin muzart shyńdy baǵyndyrǵandaı is tyndyryp, ketpekteı kesek dúnıe – etek-jeńi mol, keń panoramaly «Abyz Ábishti» dúnıege ákeldi. Avtordyń kóz maıyn taýysqan bul mereıli kitap ózi de abyz jasty jaǵalaı bastaǵan Saýytbektiń qalam qarymyn aıshyqtaǵan joıdasyz zor eńbek boldy. Qazaq mádenıetiniń damýyndaǵy orasan tabys, tarlan týyn­dy retinde baǵalanyp, Memlekettik syılyqty qanjyǵalady. Osy kitap ar­qyly Saýytbek uly jazý­shy­nyń shyǵar­mashylyq, qoǵamdyq, qaırat­kerlik, ada­mı qyrlaryna jeke-jeke toqtalyp, tap basqan tamyrshy­daı taldap, Ábish aǵamyzdy týǵan halqyna jańasha tanytty. Sóıtsek, Ábish pýblısıstıkasy onyń roman, povesteriniń ara-arasynda jazyp júrgen dúnıeleri emes eken, Ábish pýblısıstıkasy onyń sýretkerlik sıpatyn ózgeshe etip qa­lyptastyrǵan tutas bir kórkemdik álem eken, tereń tol­ǵanystardyń tunbasy eken. Bas-aıaǵy jup-jumyr tııanaqtalyp, konseptýaldy tujyrym jasalyp otyratyn árbir taraýdaǵy taratylǵan zerendi oı­lar Kekilbaevtyń kemeńgerligin kórse­týmen birge, Saýytbektiń suńǵyla sarap­shyldyǵyn da pash etti. Ǵarıfolla Ánes baýyrymnyń osy kitap Memlekettik syılyqqa usynylǵanda jazǵan maqalasyn «Oıjarys» dep ataýy sondyqtan. Av­tor­dyń orasan kúsh-jigerin jumsaǵan, kó­z­­­­­­­di ashyp, kóńildi sýarǵandaı bul ir­ge­li zertteý, jurt aıtyp júrgendeı, jýr­­nalıstıkanyń enshisine jatpaıdy. Jazýshynyń jan dúnıesin meılinshe ashyp kórsetken, onyń tól ádebıetimiz ben ulttyq mádenıetimizdegi aıshyqty orynyn belgilep, shyǵarmashylyq erek­shelikterin indete tarqatqan, klassık qalamgerdiń oıshyldyǵyn klassıkalyq zertteýler úlgisimen jiliktep shaqqan bul eńbek búgingi mádenıettaný iliminiń baǵa jetpes shalqar týyndysy ekeni daýsyz.

* * *

Muhtar Áýezov «Abaı jolynyń» alǵashqy eki tomyn qolyna qalam alyp, ózi jazǵanymen, keıingi eki tomdy mashı­nıstkaǵa aıtyp shyqqanyn bilemiz. Ol týraly Danabıke Baıqadamovanyń bestsellerge aınalǵan estelik kitabynan oqy­ǵanymyz bar. Bylaı qaraǵanda, adam senbes sırek qubylys! Olaı deıtinimiz, sol aýyzsha aıtyp otyryp jazǵan keıingi eki tomdaǵy ıirimder, ıindesken plas-qabattar, shıryqqan oqıǵalar, sóılem saptaýdyń shyraılylyǵy, beıneleýdiń bıik tásilderi, jalpy kórkemdik syndary bizdi qaıta-qaıta tańdaı qaqtyryp tamsandyra beredi. Minekı, parasattyń kemeldigi, bilimniń kemerinen asqan mol­dyǵy dep osyny aıtý kerek!

Uly Muqań sııaqty bolmaǵanmen, maqalany aıtyp jazdyrtatyn, aýdarmany aýyzsha jasaǵan birer aǵalarymyzdy biz de tanıtyn edik. Syrbaı Máýlenov, Jumaǵalı Ysmaǵulov, Nurmahan Orazbe­kov... Olarmen aralastyq, sóılestik, pikir­les boldyq. Al bizdiń býynnyń ishinde osy aǵalarynyń asyl qasıeti qonǵan sırektiń biri – Saýytbek. Ke­zin­de qylyshynan qan tamǵan qyzyl partııanyń jarshysy – «Sosıalıstik Qazaqstan» gazetiniń bas maqalasyna deıin Saýytbektiń aınalasy bir saǵattyń ishinde dıktovkamen jazyp tastaıtynyn sol kezde birge jumys istegen aǵalary búginde ańyz qyp aıtyp júr. Sonysymen Sáýkeń aýyzdarymen qus tistegen ataqty jýrnalısterdiń ózin tańqaldyrypty. Olardyń tań qalystaryn túsinýge bol­ǵandaı... О́ıtkeni partııalyq gazettiń bas maqalasy degeniń tunyp turǵan saıa­sat, artyq-kem sózi joq, sóılemi tas­taı, syqasqan akademızm stılindegi qa­sań dúnıe. Men bilgende, on alty jyl «Egemendi» basqara júrgendegi maqalalarynyń bárin derlik Saýytbek dıktovkamen jazyp shyqqan. О́zi issapar­ǵa asyǵys júretin bolǵan soń, anaý jyldary birer maqalasyn «Ústinen qarap shyǵyp, redaksııaǵa laqtyra salshy» dep maǵan elektrondy poshtaǵa jibergende, dıktovkamen jazylsa da túzetetin túk taba almaı, ári qaraı joldaýmen tynǵanbyz.

Mine, sheberlik degen qaıda jatyr! Dıktovka jasaý úshin seniń jan saraıyńda myńjyldyq mýmıedeı qunarly máıek bolýy kerek, ojaýlap jurtqa qansha taratsań da taýsylmaıtyn bilimniń nárli qory bolýy shart. Sonda ǵana zereli sóılemder, tuǵyrly tirkester taý sýyndaı tasqyndap, birinen soń biri aqtarylyp, óz-ózinen quıylyp kelip otyrady. Bireýine ózim de kýámin. Eýropa qazaqtarynyń kishi quryltaıyna Parıjge barǵanymyzda sol jerden joldaıtyn reportajyn telefonmen aıtty. Bul endi tipti qıyn. Janyńda kompıýter operatory otyrǵanda ne aıtyp jatqanyńdy ekrannan kórip turasyń, kóńilińnen shyqpaǵan jerdi túzete alasyń ǵoı, al telefonmen dıktovka jasaǵanda ol da joq.

* * *

Saýytbektiń kitap jınaýy da bólekshe. Kóbisi óziniń ǵylymı izdenisterine qatys­ty eńbekter, ádebı-mádenı zertteý tur­ǵysyndaǵy tomdyqtar, dıplomat uly Asqar Parıjden jibergen kóne folıanttar. Kórkem ádebıetten tek qana álemdik klassıka, el aýzynda júrgen keıingi maqtaýly týyndylar, tól ádebıetimizdiń injý-marjandary. Biz ǵoı, ortańqol dúnıe ekenin bile tura, keıde salystyrmaly túrde kúshenip oqyp jatamyz. Saýytbek ondaıǵa altyn ýaqytyn bólgen emes, talǵap ta, talmap ta oqıdy. Bul rette onyń talaıy zor, talǵamy bıik.

Osy jaǵdaı maǵan Kórkemsýret ýchılıshesinde oqyp júrgen kezimizdi eske salǵandaı. Bizdiń ustazymyz, qazaqtyń eljandy eren sýretshisi Muhıt Qalımov «Úıreteri shamaly nashar kartınalardy qaramańdar, ondaıǵa suqtanbańdar, kózderińdi buzasyńdar» dep jıi eskertýshi edi. Sosyn uly Repınniń: «Chtoby hýdojnıký sozdat horoshee, nado smotret tolko na velıkoe» degen sózin orysshalap kóldeneń tarta beretin.

Repınniń osy taǵylymynyń áde­bıetke de, jazýshylarǵa da tikeleı qa­tysy baryn Saýytbek dosymyz áýel bastan bilgen sekil­di. Dosymnyń alpys jyldyǵyna shy­­ǵarylǵan «Zııatker» kitabynda jarııa­lanǵan suhbatymda: «Negizi jan-jaqty bilim ıesi ǵoı. My­saly, onyń kórkemsýret salasyndaǵy bilimi men paıymy kádimgi sol salada arnaıy oqyǵan menimen birdeı. Onyń sýret óneri jaıyndaǵy pikirlerine shynymen tańǵalasyń» degen ekenmin. Kórkem polotnolardy taldaýy qandaı!

* * *

Jan dosyń jaıynda eliń emirenip jatsa, biz nege tebirenbeske! Onyń ús­tine, aıdyń-kúnniń amanynda barmaq tistep, Dıdahmetten oqys aırylyp qal­ǵan soń, biz úshin qalqıyp qasymyzda júr­gen dos­tardyń qadir-qasıeti eselep arta túsken.

Men biletin Saýytbek mansap qýmaǵan, maqsat qýǵan azamat. Onyń maqsaty jas kezinen aıqyn, muraty bıik edi. Maqsat pen muratyń asyl bolsa, alysqa silteıdi ekensiń. Áıteýir, mansap ta, qyzmet te oǵan óz-ózinen kelip jatty. Qyzmet kóli­ginsiz júrmegeniniń ózine qyryq jyl eken. Mınıstrdiń birinshi orynbasary da boldy, mınıstrdiń ózi de boldy, qazaqtyń bas gazetin, jańa jazǵanymdaı, on alty jyl boıy basqardy. Búginde – depýtat. Gazette júrgeninde jumys kúnderi bir dastarqanǵa jolamaı, zyqymyzdy shyǵaratyn. Túngi on bir, on ekisiz úıge jete almaıdy ǵoı. Udaıy izdeniste boldy. Sonyń arqa­syn­da ósti, órledi. Ol týraly meniń taǵy bir biletinim – Ábish Kekilbaevty shyǵar­mashylyq jolynyń shamshyraǵy etip ustaǵany. Seıit Qasqabasovty qııa-beldi ǵylym soqpaǵynyń úzdik úlgisi etip alǵan­dyǵy. Sábıt Orazbaevty jas kúninen janyna jaqyn, aqylshy aǵa tutatyny. Osy úsh aǵasyna degen Saýytbektiń inilik izeti, rııasyz kóńili, tipti olardy pir tutardaı syılaýy kim-kimdi de qaıran qaldyrǵandaı. «Tirlikte ilim úıren kórip júrip, jaqsylardyń sońyna erip júrip» degendeı, úlkenge ulaǵat, kishige úlgi bolatyn mundaı alǵaýsyz qurmettiń balamasyn mynaý qytymyr minez qystalań zamanda izdep tabýdyń ózi qıyn.

* * *

Biz de ala qaljyń, aqtaı kúlkige ke­nel­gen jas bolǵanbyz. Sol kóbelek qa­nat bozbala shaǵymyzdan, boztaılaq ke­zimizden qýanyshtarymyzdy birge bólis­tik, basqa túsken qasiret-qaıǵymyzǵa deıin ortaqtasyp, muńymyzdy da birge muńdastyq. Jastyqtyń aqjarqyn kóńil, ajarly kúlkige toly talaı qyzyq kúnderin qatar júrip, qol ustasyp, birge ótkizdik. Sol órimdeı jas kúnimizdiń ózinde ortamyzda Saýytbektiń orny erekshe daralanyp turatyn. Álgi daralyǵymen de ol oınap-kúlip qasynda júrgen dos­ta­rynyń ózin qurmetpen qaraýǵa máj­búrleıtin. Syrbaz minezimen, oı-órisiniń keńdigimen, paıym-parasatynyń ereksheligimen. Olarǵa qosymsha Saýyt­bek-dostyń jan dúnıesiniń tańǵy aýadaı tazalyǵy, ishki mádenıetiniń bıiktigi, joldastaryna degen kirshiksiz qarym-qatynasy ózine magnıtteı tartyp tura­tyn. Ol minezi jaıynda Ábish aǵam da kezinde «dostyqqa berik, joldastyqqa adal» dep bıik baǵasyn berip ketipti. Áli kúnge solaı... Jymıyp qoıyp, anda-sanda bir myrs etip aıtyp salar ázili qandaı! Naǵyz «jatyp atar» mergenniń ózi, tili mirdiń oǵyndaı, árdaıym ondyqqa dál tıip jatady. Sheshen tilimen, kósem sózimen dostardyń dastarqanynyń gúli de osy Saýytbek.

Endi mine, bir zamandaǵy sol jalyn júrek albyrt jastar jelip júrip, birimizdi birimiz jetektep júrip, ilgerindi-keıindi jetpiske de jetip qalyppyz. О́mi­riniń osy belesti kezeńine oraı mem­lekettik tapsyryspen Saýytbektiń bes tomdyq kitaby jaryq kórip otyr. Qazaq eli Táýelsizdiginiń 30 jyldyǵyna arnalǵan bul bes tomdyq avtordyń pýb­lı­sıstıkalyq shyǵarmalarynyń jıyn­tyǵy. Erden aspaq bolsa da, Elden as­paq joq. Bul shyǵarmalar sonaý táýel­sizdigimizdiń eleń-alańynan bastap, el tútini túzelgen qazirgi zamanǵa deıingi memleket tarıhyndaǵy kesek-kesek oqı­ǵa­lardy qamtyǵan. Saýytbektiń bul tomdyqtaryn el egemendiginiń shejiresi, táýelsizdigimizdiń kórkem hronıkasy deýge tolyq negiz bar.

* * *

Bótenge óńin bermeıtin, syryn ashpaıtyn, oqtaý jutqandaı ılikpeıtin saltanat ıesi Sáýkeń óziniń otbasyna, otarly janyna kelgende baǵy janǵan orazdy azamat. Otaǵasynyń otbasyna degen iltıpaty erek, syılastyǵy bólek. Bala-shaǵa, nemerelerine degen meıirimi, jan shýaǵy kim-kimge de úlgi bolǵandaı. Al dos-jarannyń ortasynda onyń minezi jibekteı, asqan baýyrmal, kóńili aǵedil. Bizge qaraǵanda aramyzdaǵy júregi názik jan da osy Saýytbek. Atyń óshkir koronavırýs túgili, bireýimiz jótelip qalsaq ta eleńdep turatyn janashyr dosymyz. Taǵy da esime tústi... Aqyry solaı bolaryn qaıdan bileıik, osydan eki jyl buryn «polıp» degen báleni asqazannan alamyz dep Almatyda otaǵa ońbaı túskenimiz bar. Táýlikten soń kózimizdi tyrnap ashyp, jasandy ottegimen dem alyp jatsaq ta, tótenshe jaǵdaıymyzdy aıtyp, eń aldy­­men Saýytbekke telefondaǵanbyz. Aýzymyzda tumyldyryq, bas-aıaǵymyz shyrmalǵan tútiksheni kórgende, «vıdeoda» turǵan dosymnyń kózinen móldirep jas shyǵyp ketken. Almatydaǵy menen ondaı oqys jaǵdaıdy kútpese kerek, «Nege eskertpegensiń, qasyńda bolatyn edik qoı» dedi de, yqylyq atyp, shashalyp, sóıleı almaı qaldy. Qaraılaýǵa mursha bermes qaımalysqan mynaý jatbaýyr zamanda shyn dosymnyń baryn men sonda kózimmen kórgen edim, júrekpen sezinip, búkil jan-dúnıemmen uqqan edim. Dostyq­tyń sáni – qımastyq degen osy shyǵar!

Joldasy jaqsynyń saparda joly qysqa, tirlikte ǵumyry uzyn bolady desedi. Laıym, babalardan qalǵan osy ulaǵat Saýytbektiń mańaıyna toptasqan bizge de juǵysty bolǵaı dep tileımin.

 

Álibek ASQAROV,

Memlekettik syılyqtyń

laýreaty