Qaı kezde de sharýasy shash etekten bolyp júretin shaǵyn jáne orta bıznes ókilderine ýaqyt únemdeý mańyzdy. Endi kepildik berý shartyna qol qoıý rásimi de onlaın júzege asyrylatyn boldy.
Sonymen 8 qarashadan bastap shaǵyn jáne orta bıznes ókili jáne bank pen «Damý» kásipkerlikti damytý qory» AQ («Damý» qory) arasyndaǵy kepildik shartyna qol qoıý tek ESQ arqyly onlaın atqarylmaq. Bul – 2021 jyldyń 25 qazanynda qabyldanǵan jáne 2021 jyldyń 7 qarasha kúni kúshine enetin «Saqtaý merzimin kórsete otyryp, memlekettik jáne memlekettik emes uıymdar qyzmetinde jasalatyn úlgilik qujattar tizbesin bekitý týraly» buıryqqa engen ózgerister men tolyqtyrýlar nátıjesinde júzege asty.
– Kepildik berý shartyna onlaın qol qoıý – bizdiń kásipkerler úshin óte mańyzdy jáne eleýli oqıǵa. Osy qyzmettiń arqasynda prosedýra ashyq ótedi. Adamnyń adamǵa kúni túspeıdi, kásipkerdiń, ásirese, shalǵaı eldi mekenderde jumys isteıtinderdiń ýaqytyna da únem. Kepildik suraıtyn ótinimderdiń 72%-y bizge onlaın kelip túsedi. Endeshe, kásipkerlerdiń barlyǵy kepildik berilgen kezde shartqa da onlaın qol qoıǵysy keledi. 2021 jyldyń úsh toqsanynda biz kepildik suraǵan 12,4 myń ótinimdi maquldadyq. Bul – byltyrǵy osy kezben salystyrǵanda 1,7 ese artqanyn kórsetedi, – deıdi «Damý» kásipkerlikti qoldaý qory» AQ basqarma tóraıymy Gaýhar Býrıbaeva.
Kepildikke ótinimdi onlaın berý prosesi 2016 jyly engizilgen. Sonyń arqasynda kásipkerge óz ótiniminiń qaı deńgeıde qaralyp jatqanyn jeke kabınetinde baqylap otyrýǵa múmkindik týdy. Al endi «Damý» qorynyń taǵy bir bastamasy – kepildik shartyna qol qoıý da sıfrlandy.
Qordyń taǵy bir qoldaý quraly – sýbsıdııa boıynsha shart jasasqanda ESQ arqyly qol qoıý prosesin «Damý» qory 2019 jyly engizgen edi. Ol kezde de taraptardyń shartqa qol qoıý rásimi bir-aq jumys kúnine deıin qysqaryp, ońtaılanǵan bolatyn. Kásipkerler bul opsııany qýana qabyldaǵanyn bilemiz.
Sol 2019 jyly ESQ qoldaný arqyly onlaın qol qoıylǵan qujat sany 1700 bolsa, 2020 jyly 23 myńǵa jetti, al 2021 jyldyń úsh toqsanynda 36 800 shart pen olarǵa qosymsha kelisimderge qol jetkizildi.
Barlyq prosesti barynsha avtomattandyrýdyń arqasynda «Damý» qory ótinimderdi tolyq qamtyp qana qoımaı, sonymen qatar ótinim berýshilerge qyzmet kórsetý prosesin aıtarlyqtaı jedeldete túskeni qýantady.
ALMATY