3 mlrd-tan astam qoldanýshysy bar, 110-nan astam tilde aqparat taratatyn áıgili Facebook áleýmettik jelisi Meta degen ataýmen rebrendıng jasaǵany ótken aptada belgili bolǵan edi. Kompanııanyń negizin qalaýshy Mark Sýkerberg jańa jobalaryn tanystyra kele: «Kezinde áleýmettik jeliler álemine transformasııa jasasam, endi kúndelikti qarym-qatynasty jańa deńgeıge kóterip, oǵan da transformasııa jasaıtyn ýaqyt keldi» dep málimdedi.
Jurtshylyqqa bárinen buryn ábden kóz úırenip qalǵan Facebook ataýynyń Meta dep ózgerýi tańsyq boldy. Al rebrendıngtiń astarynda ne jatyr? Álemniń mıllıardtaǵan adamyn bir ózine «baılap» qoıǵan qaýqarly kompanııanyń aıaqastynan úırenshikti ataýyn ózgertýi tegin emes. Vırtýaldy ǵalamnyń búge-shigesin jetik meńgergen Sýkerbergtiń bul sheshimi bir kúnde týǵan joq. Ol kúndelikti tirshiligimizge metaǵalamdy (metaverse) engizbekshi, ıaǵnı AR men VR tehnologııalary bizge úırenshikti daǵdy bolyp qalyptaspaq.
AR men VR tehnologııalary ne ekenin jurtshylyq jaqsy bilse kerek. Bul – vırtýaldy álem. Bir sózben aıtqanda, kózildirik, shlem, qulaqqap sekildi qurylǵylar arqyly beriletin 3-5D tehnologııalarynyń kómegimen siz basqa álemniń shyndyǵyna enesiz, ondaǵy tirshilikti naqty ómirdegideı sezine alasyz. Mysaly, siz 3D kózildirigin kıip alyp, kenet kórip otyrǵan fılmniń nemese oınap otyrǵan beıneoıynnyń ishine enip, ondaǵy oqıǵalardy naqty ómirdegideı sezinseńiz, onda bul – VR tehnologııasy. Al kóshede kele jatyp, aldyńyzdan kompıýter áleminen ǵana kóretin Dregonaıt pokemony shyǵa kelse, bul – AR.
Mine, osyndaı sensorly keńistikti Sýkerbýrg kúndelikti ómirimizge kiriktirmek. «Dál qazir meniń aıtyp jatqanym sizderge qııal-ǵajaıyptaı kórinýi múmkin. Biraq jaqyn bolashaqta transformasııa jasalǵan mundaı qarym-qatynas sizderge úırenshikti bolyp qalady», deıdi M.Sýkerberg.
Onyń túsindirýinshe, endi Metany qoldanýshylar tek smartfondarǵa úńilip qana qoımaı, 3D tehnologııalardyń kómegimen álemniń ekinshi shetindegi adamdardyń janynda otyrǵandaı sezinedi. Olardyń «janynda otyryp», birge fılm kóredi, shahmat oınaıdy, konferensııa, jıyndarda da birge júrgendeı sezimde bolady.
Sýkerberg kóterip otyrǵan tujyrymdamanyń ón boıynda ınternet álemin jáne kúndelikti qoǵam qarym-qatynasyn vızýaldy deńgeıge kóterý ıdeıasy jatyr. «Osy tehnologııalyq jańarý arqyly biz adamdardy bir-birimen jaqyndastyra túsemiz. Alaıda kompanııanyń ataýy ózgergenimen bizdiń basty mıssııamyz sol qalpynda qala beredi. Negizgi baǵytqa metaálemdi damytý maqsaty ǵana qosyldy», deıdi M.Sýkerberg kók lenta túrinde mebıýs beınelengen jańa logotıpti tanystyryp jatyp.
Ne desek te bul Facebook qoldanýshylary úshin eleýli jańalyq boldy jáne bul erekshe sheshim kompanııa aksııalarynyń kúrt ósýine alyp keldi. Máselen, onyń ataýy ózgeredi degen habarlandyrýdan keıin-aq Facebook aksııalary birden 4 paıyzǵa artqan. О́tken aptadaǵy qor naryǵynyń qorytyndysy boıynsha onyń ár aksııasynyń quny 323 dollarǵa baǵalandy.