Túrkistan oblystyq mádenıet basqarmasy men Qazyǵurt aýdany ákimdigi uıymdastyrýymen Túrkistandaǵy «Kongress holl» konsert zalynda «Burań bel» oblystyq bı baıqaýy ótti. «Sálem saǵan, Túrkistan» óner festıvali aıasynda ótken baıqaýda 17 bı ujymy baq synady.
Baıqaýdyń ashylý saltanatynda Túrkistan oblysy ákiminiń orynbasary Sáken Qalqamanov quttyqtaý sóz sóılep, óńirde mádenıet pen ónerge qoldaý kórsetý jalǵasatynyn jetkizdi. Al oblystyq mádenıet basqarmasy basshysynyń orynbasary Asylhan Temirhan óner festıvaliniń mańyzyna keńinen toqtalyp, jas talanttardy tanytýdaǵy orny erekshe ekenin atap ótti. Mádenıet qaıratkeri, Qazaqstannyń úzdik horeografy, qazylar alqasynyń tóraǵasy Aıbolat Orynbaı, «Iаssy» bı ansambliniń jetekshisi Qýat Taýkeev, «Farab» bı ansambliniń jetekshisi Marıanna Shalıkashvılı, «Juldyzdar» halyqtyq bı ujymynyń jetekshisi Jannat Baltaeva jáne halyqaralyq bı baıqaýlarynyń laýreaty Jangúl Ersultanova qazylyq etken baıqaý qorytyndysy boıynsha Qazyǵurt aýdanynyń «Tańsholpan» bı toby Gran-prıdi ıelendi. Birinshi oryndy Jetisaı aýdanynan kelgen «Aıana» bı toby jeńip alsa, 2-oryn Arys qalasynyń «Altynaı» bı tobyna buıyrdy. Úshinshi orynǵa Qazyǵurt aýdanynyń «Balaýsa» jáne Kentaý qalasynyń «Rapsodııa» bı ujymdary laıyq dep tanyldy. Jeńimpazdar men júldegerlerge dıplom jáne aqshalaı syılyq tapsyryldy.