Qazaqstan Respýblıkasy Táýelsizdiginiń 30 jyldyǵy qarsańynda Ulttyq qaýipsizdik komıteti «Memlekettik shekara» atty týyndyny oqyrman nazaryna usyndy, dep habarlaıdy Egemen.kz.
Kitap óziniń qaltqysyz qyzmeti arqyly memlekettik shekarany kúzetý isine ólsheýsiz úles qosqan jaýyngerlerge arnalady. «Memlekettik shekaradaǵy» áńgimelerde, ocherkter men maqalalarda táýelsiz Qazaqstannyń Shekara qyzmetiniń dańqty shejiresindegi aıtýly oqıǵalar qamtylǵan. Shekaranyń tynyshtyǵyn kúzetkenderdiń tynymsyz tirshiligi, árbir qazaqstandyq úshin qasıetti sanalatyn el shebin kúzetý kezindegi bastarynan keshken shıeleniske toly oqıǵalarymen erekshelenedi. Kitapty qolyna alǵan oqyrman ózin keıipkerlermen birge el shebinde júrgendeı, birde jaıaý, birde atpen, taǵy birde ıtpen birge qarýyn ustap, taý asyp, sý keship, teńiz tolqyndaryna qarsy júzgendeı áserge bólenedi.
Shekaradan ótkizýge qatań tyıym salynǵan esirtki tasymaldaýshyny quryqtap, taýdyń ishinde mal baǵyp buıyǵy tirshilik keship jatqan shopannyń otbasyn kepilge alǵan qylmyskerden taısalmaǵan shekarashyny sý da, órt te alǵan betine qaıtara almaıtynyn «Memlekettik shekaradaǵy» oqıǵalar arqyly kóz jetkizýge bolady.
Týyndyny oqyǵan ardager shekarashy ózimen birge qyzmet atqarǵan qarýlasymen qaýyshady, al jınaqtaǵy oqıǵalar kishi býyn shekarashyny jańa erlikke úndeıdi.
Bul kitap – qoǵam damýyna úles qosatyn qundy eńbek. Ásirese, óskeleń urpaqqa táýelsiz elimizdiń tynyshtyǵy shekaradan bastalatynyn sanasyna uıalatatyn tamasha týyndy. О́ıtkeni, shekara – táýelsizdigimizdiń tiregi.
«Memlekettik shekara» - shekarashylar úshin ǵana emes, áskerı ómirden tysqary qarapaıym adamdar úshin de oqylymdy, qalyń oqyrmanǵa arnalǵan.